राष्ट्रियसभाबाट ‘सङ्क्रामक पशु रोग (नियन्त्रण) विधेयक, २०८३’ सर्वसम्मतिले पारित: पशु स्वास्थ्य सुरक्षालाई प्राथमिकता

काठमाडौँ, असोज ५ गते । राष्ट्रियसभाको आजको बैठकबाट ‘सङ्क्रामक पशु रोग (नियन्त्रण) विधेयक, २०८३ लाई पारित गरियोस्’ भन्ने प्रस्ताव सर्वसम्मतिले पारित भएको छ।

कृषि, वन तथा पर्यावरणमन्त्री गिता चौधरीले उक्त विधेयक पारित गरियोस् भनी प्रस्तुत गर्नुभएको प्रस्तावलाई सभाले सर्वसम्मत रूपमा स्वीकृति प्रदान गरेको हो।

बैठकमा विधेयक छलफलका लागि पेस गर्दै मन्त्री चौधरीले पशुहरूमा देखिने रोगको वर्तमान अवस्था र हालको कानुनी व्यवस्था अपर्याप्त रहेकाले नयाँ विधेयक ल्याउनुपरेको स्पष्ट पार्नुभयो। उहाँले विधेयकको मुख्य उद्देश्य, आवश्यकता र यसमा समावेश गरिएका महत्त्वपूर्ण प्रावधानहरूबारे सभालाई जानकारी गराउनुभयो।

विधायन व्यवस्थापन समितिमा सांसदहरूले दर्ता गराएका संशोधन प्रस्तावहरूमाथि दफावार छलफल गरी विधेयकलाई थप समृद्ध र कार्यान्वयन योग्य बनाइएको मन्त्री चौधरीले बताउनुभयो। यो ऐन कार्यान्वयनमा आएपछि सङ्क्रामक पशु रोगको रोकथाम तथा नियन्त्रण थप प्रभावकारी हुने विश्वास लिइएको छ।

विधेयकमाथिको छलफलमा राष्ट्रियसभा सदस्यहरूले आ-आफ्नो धारणा राख्नुभएको थियो। आजको बैठक सम्पन्न गर्दै राष्ट्रियसभाका अध्यक्ष नारायणप्रसाद दाहालले सभाको अर्को बैठक आगामी असोज ८ गते बिहीबार दिउँसो १:१५ बजे बस्ने जानकारी दिनुभयो।