टिकटकर ‘तुलसा अधिकारी’ पुर्पक्षका लागि थुनामा, सम्पत्ति शुद्धीकरण र ठगी मुद्दा दायर

काठमाडौँ । ललितपुर जिल्ला अदालतले टिकटकर तुलसा अधिकारी (तुलसी अधिकारी) लाई पुर्पक्षका लागि थुनामा पठाउने आदेश दिएको छ। बिहीबार न्यायाधीश टेकनाथ गौतमको इजलासले प्रस्तुत प्रमाणहरूको आधारमा अधिकारीलाई थुनामा राखी मुद्दाको पुर्पक्ष गर्ने आदेश जारी गरेको हो।

सरकारी वकिलको तर्फबाट तीन जना कानुन व्यवसायीले बहस गरेका थिए भने प्रतिवादी अधिकारीका पक्षबाट आठ जना कानुन व्यवसायीले बहस गरेका थिए।

अधिकारीलाई थाइल्यान्डबाट पक्राउ गरी गत शनिबार राति काठमाडौँ ल्याइएको थियो। उनीविरुद्ध ललितपुर जिल्ला अदालतमा सम्पत्ति शुद्धीकरण, आपराधिक लाभ र ठगीसम्बन्धी मुद्दा दायर गरिएको छ।

एक व्यवसायीको जाहेरीका आधारमा जिल्ला सरकारी वकिल कार्यालय ललितपुरले २०८२ चैतमा ६ करोड ५२ लाख २९ हजार रुपैयाँ बिगो कायम गर्दै मुद्दा दायर गरेको हो। यस मुद्दामा अधिकारीसहित १० जना प्रतिवादी रहेका छन्।