नेप्से परिसूचक २० अंकले घट्यो: कारोबार रकम ३ अर्ब २७ करोडमा सीमित

काठमाडौँ, असोज १९ गते । नेपाल स्टक एक्स्चेन्ज (नेप्से) परिसूचक साताको पहिलो कारोबार दिन सोमबार २०.४८ अंकले घटेर २५६६.७६ अंकको विन्दुमा झरेको छ।

नेपाल धितोपत्र बोर्डले ५ प्रतिशतभन्दा बढी सेयर भएका संस्थापक लगानीकर्ताले पूर्वजानकारी र स्वीकृति लिएर मात्र सेयर बिक्री गर्न पाउने कडा व्यवस्था गरेपछि बजार निरन्तर ओरालो लागिरहेको हो।

धितोपत्र बोर्डले लकइन अवधि सकिएपछि संस्थापक सेयरधनीहरू बाहिरिने क्रम बढेको भन्दै यस्तो नियन्त्रणमुखी कदम चालेको हो। यस व्यवस्थाले सेयर लगानीकर्ताको मनोबल कमजोर बनाएको बजार विश्लेषकहरूको भनाइ छ। यद्यपि प्रतिनिधिसभा अन्तर्गतको अर्थ समितिले सो व्यवस्थामा पुनर्विचार गर्न निर्देशन दिइसकेको भए पनि बजारमा सुधार आउन सकेको छैन। साथै, लाभांशको सिजन भएकाले सेयर मूल्य समायोजन हुनुले पनि सूचक घटाउन भूमिका खेलेको छ।

सोमबार नेप्सेमा कारोबार रकममा पनि उल्लेख्य गिरावट आएको छ। दिनभरमा ३५९ कम्पनीका ९० लाख कित्ता सेयर ४४ हजार ७७७ पटक कारोबार हुँदा कुल ३ अर्ब २७ करोड रुपियाँ बराबरको मात्र सेयर खरिद-बिक्री भएको छ। यो कारोबार रकम गत साताको अन्तिम कारोबार दिन शुक्रबार (३ अर्ब ८९ करोड) को तुलनामा थोरै हो।

सोमबारको बजारमा ३२ कम्पनीको सेयर मूल्य बढ्दा २४२ कम्पनीको घटेको छ भने ४ कम्पनीको मूल्य स्थिर रहेको छ। समूहगत परिसूचकतर्फ व्यापार समूह १०.७१ अंकले बढे पनि बाँकी सबै समूहहरू (उत्पादनमूलक १०४.५१, जीवन बीमा ९३.८१, होटल ७३.२८, निर्जीवन बीमा ६०.९९, जलविद्युत् ३६.९५ र बैंकिङ १०.७३ अंक) ऋणात्मक रहेका छन्।

शीर्ष कमाउने कम्पनीहरू (Top Gainers)

शीर्ष गुमाउने कम्पनीहरू (Top Losers)