सडक अवरुद्ध भएपछि पोखरा–जोमसोम उडान दोब्बर: दैनिक १४ उडानबाट २०० भन्दा बढी यात्रु मुस्ताङ पुग्दै

जोमसोम (मुस्ताङ), असोज १७ गते । बाढीपहिरो र कालीगण्डकी नदीको कटानका कारण कालीगण्डकी करिडोर अन्तर्गत ७६ किलोमिटर लामो बेनी–जोमसोम सडकखण्ड पूर्ण रूपमा अवरुद्ध भएपछि पोखरा–जोमसोम हवाई उडानमा यात्रुको चाप अत्यधिक बढेको छ। सडक सञ्जाल ठप्प भएपछि पोखराबाट मुस्ताङ जाने र फर्किने एकमात्र विकल्प हवाई मार्ग बनेको हो।

यात्रुको चाप बढेसँगै तारा एयरलाइन्स र समिट एयरलाइन्सले पोखराबाट हुने आफ्ना दैनिक उडानहरू दोब्बरभन्दा बढी पुर्‍याएका छन्। जोमसोम विमानस्थलका प्रमुख विश्वराज शर्माका अनुसार पहिले सडक सञ्चालनमा हुँदा दैनिक ५ वटासम्म उडान हुने गरेकामा अहिले दुवै वायुसेवाले दैनिक ७-७ वटा (कुल १४ वटा) नियमित उडान गर्दै आएका छन्।

हवाई उडान सुचारु भएपछि सोह्रश्राद्धमा मुक्तिनाथ र कागबेनीमा पितृतर्पणका लागि जाने नेपाली तीर्थालुहरूसहित भारतीय तथा तेस्रो मुलुकका पर्यटकहरूलाई ठुलो राहत पुगेको छ। अहिले दैनिक दुई सयभन्दा बढी पर्यटक हवाई मार्ग भएर मुस्ताङ प्रवेश गरिरहेका छन् भने कतिपय तीर्थालुहरू हेलिकप्टर चार्टर गरेर समेत मुक्तिनाथ पुग्ने गरेका छन्।

मौसम प्रतिकूल हुने र तीव्र हावाहुरी चल्ने भएकाले १८ जना यात्रु क्षमता भएका ट्विनअटर विमानमार्फत बिहान ११ बजेसम्म मात्र उडान सञ्चालन गरिने गरिएको छ। वर्षमा करिब छ महिना मात्र नियमित हुने यो हवाई मार्ग बर्खा र जाडोयाममा भने बन्द हुने गर्दछ।