बिजनेस अभावका बिच राष्ट्रिय सभाको २१ औँ अधिवेशन अन्त्य: १३ विधेयक पारित, ९ सदस्यीय विशेष समिति गठन

काठमाडौँ, असोज १७ गते । राष्ट्रिय सभाको २१ औँ अधिवेशन अन्त्य भएको छ। राष्ट्रपतिको कार्यालयबाट प्राप्त अधिवेशन अन्त्यसम्बन्धी पत्र शुक्रबारको बैठकमा वाचन गर्नुअघि राष्ट्रिय सभाका अध्यक्ष नारायणप्रसाद दाहालले ‘बिजनेस अभाव’ का कारण नियमित बैठक बस्न नसकेको दुःख व्यक्त गर्नुभयो। १४५ दिनसम्म चालु रहेको यस अधिवेशनमा बिजनेसको कमी हुँदा बेलाबेलामा बैठक प्रभावित हुनुपरेको उहाँको भनाइ थियो।

अधिवेशन अवधिभर राष्ट्रिय सभाले अभौतिक सांस्कृतिक सम्पदा संरक्षण विधेयक, २०८१, सङ्क्रामक पशु रोग नियन्त्रण विधेयक, २०८३ र आन्तरिक वायुसेवाको दायित्वसम्बन्धी विधेयक, २०८३ पारित गरी प्रतिनिधि सभामा पठाएको छ।

यस्तै, चार वटा अध्यादेश र अध्यादेशलाई प्रतिस्थापन गर्ने ६ वटा विधेयक तथा बजेट आश्रित ३ विधेयकसहित कुल १३ वटा विधेयक पारित भएका छन्। हाल राष्ट्रिय सभामा कुनै पनि विधेयक विचाराधीन अवस्थामा बाँकी छैनन्।

तर, प्रतिनिधि सभाबाट सन्देशसहित प्राप्त ‘वैकल्पिक विकास वित्त परिचालन विधेयक, २०८२’ भने विपक्षी सांसदहरूको लगातारको अवरोधका कारण राष्ट्रिय सभाबाट पारित हुन सकेन। राष्ट्रिय सभाको बैठक जारी रहेकै बेला निर्धारित समयभित्र विधेयक पारित हुन नसकेको यो बिरलै देखिने उदाहरण बनेको छ।

अधिवेशन अवधिमा राष्ट्रिय सभाले ग्यास आपूर्ति, विपद् व्यवस्थापन र सांसदहरूका प्रश्नको जवाफ दिन सरकारलाई तीन वटा छुट्टाछुट्टै रुलिङ गरेको छ। यसका साथै, भोटेकोशी बाढी तथा कालीगण्डकी कोरिडोर विपत् व्यवस्थापनसम्बन्धी अध्ययन तथा अनुगमन गर्न राष्ट्रिय सभाले असोज १५ गते ९ सदस्यीय संसदीय विशेष समिति गठन गरेको छ।