रास्वपा केन्द्रीय समितिको बैठक आज अपराह्न वनस्थलीमा बस्दै: उम्मेदवार छनोट र विभागीय प्रमुख मनोनयन मुख्य एजेन्डा

काठमाडौँ, असोज १७ गते । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज अपराह्न पार्टी केन्द्रीय कार्यालय वनस्थलीस्थित ‘घन्टीघर’ मा बस्दैछ। आगामी स्थानीय तह निर्वाचन तथा पार्टीका आन्तरिक सङ्गठनात्मक एजेन्डाहरूमा छलफल गर्न बैठक आह्वान गरिएको हो।

पार्टी प्रवक्ता जगदीश खरेलका अनुसार बैठकमा विशेष गरी आगामी स्थानीय तह उपनिर्वाचनका लागि केन्द्रीय उम्मेदवार छनोट समितिमा सदस्यहरूको मनोनयन गर्ने विषयमा गहन छलफल हुनेछ।

पार्टी सभापति रवि लामिछानेको अध्यक्षतामा बस्ने उक्त बैठकमा पार्टीका विभिन्न विभागीय प्रमुख तथा उपप्रमुखहरूको मनोनयन प्रक्रियालाई अन्तिम रूप दिने कार्यसूची रहेको छ।

यसैगरी, केन्द्रीय समिति तथा प्रतिनिधि सभा सदस्य (सांसद) हरूको नेतृत्वमा देशभर सञ्चालन गर्न लागिएको ‘हामी आउँदै छौँ’ अभियानको कार्ययोजना र मधेश प्रदेश सङ्गठनको हालै तयार पारिएको ‘अडिट’ प्रतिवेदनमाथि पनि छलफल गरी आवश्यक निर्णय लिइने जनाइएको छ।