सङ्घीय संसद् कुनै पनि हालतमा कमजोर भएको छैन: सभामुख डोलप्रसाद अर्याल

काठमाडौँ, असोज १६ गते । प्रतिनिधि सभा सभामुख डोलप्रसाद अर्यालले सङ्घीय संसद् कुनै पनि हालतमा कमजोर नभएको स्पष्ट पार्नुभएको छ। सिंहदरबारमा आज आयोजित पत्रकार सम्मेलनमा बोल्दै उहाँले सङ्घीय संसद् सशक्त, मर्यादित र प्रभावकारी ढङ्गले सञ्चालन भइरहेको बताउनुभयो।

पत्रकार सम्मेलनमा बोल्दै सभामुख अर्यालले संसद्मा सांसदहरूले उठाउनुभएका विषयमा आफूले टिप्पणी गर्नु सान्दर्भिक नहुने बताउँदै भन्नुभयो, “सङ्घीय संसद्मा सदस्यहरूले उठाउनुभएको विषयमा मैले टिप्पणी गर्न नमिल्ला, तर संसद् कमजोर भएको महसुस मैले बिलकुल गरेको छैन।”

सभामुख अर्यालले संसद्को आफ्नै मर्यादा र कार्यशैली हुने र सोही अनुसार काम भइरहेको बताउनुभयो। तीन करोड नेपाली जनताको हितका लागि सांसद र जनप्रतिनिधिहरू निरन्तर खटिरहेको उल्लेख गर्दै उहाँले कार्यपालिकालाई झकझक्याउने जिम्मेवारी सांसद, नागरिक र पत्रकार सबैको रहेको धारणा व्यक्त गर्नुभयो।

यसैगरी, सभामुख अर्यालले आगामी संसद्को अधिवेशन (हिउँदे अधिवेशन) नयाँ भवनबाटै सञ्चालन हुनेमा आफू पूर्ण रूपमा विश्वस्त रहेको बताउनुभयो। राष्ट्रियसभा र प्रतिनिधिसभा दुवै सदनका आगामी बैठकहरू सिंहदरबारस्थित नयाँ संसद् भवनबाटै सञ्चालन गर्ने गरी तयारी भइरहेको उहाँको भनाइ छ।