‘जेन-जी’ आन्दोलनका दोषी र भ्रष्टाचारीलाई कारबाही गर्न राप्रपा सांसद ज्ञानेन्द्र शाहीको माग

काठमाडौँ, असोज १६ गते । राष्ट्रिय प्रजातन्त्र पार्टी (राप्रपा) का सांसद ज्ञानबहादुर (ज्ञानेन्द्र) शाहीले ‘जेन-जी’ आन्दोलनको छानबिन गर्न गठित समितिले दोषी ठहर गरेका व्यक्तिहरू तथा भ्रष्टाचारमा संलग्नहरूलाई तत्काल कारबाही गर्न माग गर्नुभएको छ। प्रतिनिधि सभाको आजको बैठकमा विशेष समय लिएर बोल्दै उहाँले यस्तो माग गर्नुभएको हो।

संसद्‌मा बोल्दै सांसद शाहीले अपराधजन्य कुनै पनि घटनामा दोषी प्रमाणित भएका जो-कोहीलाई कारबाही गरिए त्यसमा आफ्नो पार्टीको पूर्ण समर्थन रहने स्पष्ट पार्नुभयो। उहाँले निष्पक्ष छानबिन गरी दोषीलाई कानुनी दायरामा ल्याउन सरकारको ध्यानाकर्षण गराउनुभयो।

यसैगरी, उहाँले वैदेशिक रोजगारीको बाध्यताप्रति चिन्ता व्यक्त गर्दै युवाहरू विदेश जानुपर्ने अवस्थाको अन्त्यका लागि स्वदेशमै उद्योग, कलकारखाना, र स्वास्थ्य संस्थाहरूको थप विकास एवं विस्तार गर्न सरकारसँग आग्रह गर्नुभयो।

साथै, सांसद शाहीले हालैको बाढी-पहिरोबाट प्रभावित पीडितहरूका लागि उचित राहत र क्षतिपूर्तिको व्यवस्था गर्दै चाँडो पुनःस्थापनाका लागि ठोस तथा प्रभावकारी कार्यक्रम ल्याउन सरकारसँग माग गर्नुभयो।