सङ्घीय संसद्का दुवै सदनको बैठक आज बस्दै: विभिन्न विधेयक समितिमा पठाउने र पारित गर्ने कार्यसूची

काठमाडौँ, असोज १६ गते । सङ्घीय संसद्का दुवै सदन (प्रतिनिधिसभा र राष्ट्रियसभा) को बैठक आज (शुक्रबार) बस्दैछ। बिहान ११ बजे सिंहदरबारमा बस्ने प्रतिनिधिसभाको बैठकमा सभामा प्रस्तुत हुन नसकेका मौखिक तथा लिखित प्रश्नका उत्तरहरू सम्बन्धित मन्त्रीहरूले टेबुल गर्ने कार्यसूची रहेको छ।

प्रतिनिधिसभाको बैठकमा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले ‘राष्ट्रिय प्राकृतिक स्रोत तथा वित्त आयोगको आठौँ वार्षिक प्रतिवेदन, २०८३’ पेस गर्नुहुनेछ। साथै, कानुनमन्त्री गौतम, पूर्वाधार विकासमन्त्री सुनिल लम्साल, महिला तथा सामाजिक सुरक्षामन्त्री सीता बादी र स्वास्थ्यमन्त्री निशा मेहताले विभिन्न महत्वपूर्ण विधेयकहरूलाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नुहुनेछ।

आजको प्रतिनिधिसभा बैठकमा ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ पारित गर्ने कार्यक्रम रहेको छ। यसैगरी सभामुख डोलप्रसाद अर्यालले १० वा सोभन्दा बढी बैठकमा अनुपस्थित सांसदहरूको अनुपस्थितिको सूचना स्वीकृतिका लागि पेस गर्नुका साथै राष्ट्रपतिबाट प्राप्त पत्र पढेर सुनाउनुहुनेछ।

अर्कोतर्फ, राष्ट्रियसभाको बैठक अपराह्न १:१५ बजे बस्दैछ। राष्ट्रियसभामा प्रतिनिधिसभाबाट संशोधनसहित फिर्ता आएको ‘राष्ट्रिय विधि विज्ञान प्रयोगशाला विधेयक, २०८१’ को संशोधनमा सहमति जनाउने प्रस्ताव प्रस्तुत हुनेछ भने ‘आन्तरिक वायु सेवाको दायित्वसम्बन्धी विधेयक, २०८३’ पारित गर्ने कार्यसूची तय गरिएको छ।