चाडपर्वमा काठमाडौँ–धनगढी हवाई भाडा वृद्धिप्रति सांसद रमेश प्रसाईँको आपत्ति: मन्त्रीको ध्यानाकर्षण

काठमाडौँ, असोज १५ गते । राष्ट्रिय स्वतन्त्र पार्टी (रास्वपा) का सांसद रमेश प्रसाईँले दसैँ–तिहारको समयमा काठमाडौँ–धनगढी हवाई भाडामा भएको अचाक्ली वृद्धिप्रति तीव्र आपत्ति जनाउनुभएको छ।

प्रतिनिधि सभाको बैठकमा बोल्दै उहाँले सभामुखमार्फत संस्कृति, पर्यटन तथा नागरिक उड्डयनमन्त्रीको गम्भीर ध्यानाकर्षण गराउनुभएको हो।

संसद्मा बोल्दै सांसद प्रसाईँले चाडपर्वको मौका छोपेर सर्वसाधारणलाई मारमा पार्ने गरी वायुसेवा कम्पनीहरूले हवाई भाडा बढाउनु गलत भएको बताउनुभयो। नागरिकहरू घर फर्किने मुख्य सिजनमा मनपरी भाडा लिनु न्यायोचित नभएको उहाँको भनाइ छ।

उहाँले संसद्‌मा भन्नुभयो, “काठमाडौँ–धनगढी र धनगढी–काठमाडौँको हवाई भाडा १६ हजार रुपियाँ पुर्‍याइनु मनपरी र मौकामा चौका हान्ने काम हो। कालोबजारी भनौँ भने एयरलाइन्सहरूको मन दुख्ला, तर यो सरासर गलत हो।”

सांसद प्रसाईँले चाडपर्वका बेला सर्वसाधारण यात्रीहरू ठगिने क्रम रोक्न र हवाई भाडा नियन्त्रण तथा नियमन गर्न सरकारले तत्काल ठोस कदम चाल्नुपर्ने सुझाव दिनुभयो।