पूर्वप्रधानन्यायाधीश जबराको गिरफ्तारीले सरकार फासीवादतर्फ उन्मुख भएको देखियो: रामकुमारी झाँक्री

काठमाडौँ, असोज १५ गते । नेकपा (एमाले) की सांसद रामकुमारी झाँक्रीले पूर्वप्रधानन्यायाधीश चोलेन्द्र शमशेर जबराको गिरफ्तारीले सरकार फासीवादतर्फ उन्मुख भएको आरोप लगाउनुभएको छ।

बिहीबार बसेको राष्ट्रिय सभाको बैठकमा बोल्दै उहाँले पूर्वप्रधानन्यायाधीशलाई पक्राउ गर्नुको आधार र कारण दिन नसकेर सरकारलाई लाज छोप्नै धौ-धौ परिरहेको टिप्पणी गर्नुभयो।

संसद्मा बोल्दै सांसद झाँक्रीले भन्नुभयो, “फासीवाद वा तानाशाही व्यवस्था कसरी आउँछ भनेर दुनियाँमा धेरै किताबहरू लेखिएका छन्; हामी अहिले यस्तै अभ्यास गर्न अभिशप्त हो कि जस्तो देखिन्छ।” पूर्वप्रधानन्यायाधीश जबरालाई पक्राउ गर्नुको पछाडि कुनै आधार, प्रमाण र कारण नभएको उहाँको दाबी छ।

सांसद झाँक्रीले कार्यकारी प्रमुख (प्रधानमन्त्री) मा हुने शक्तिको दुरुपयोग गरी न्यायपालिका र व्यवस्थापिकामाथि अप्रत्यक्ष प्रहार भइरहेको भन्दै तीव्र आपत्ति जनाउनुभयो। उहाँले यस कदमले राज्यका अन्य अङ्गहरूको स्वायत्ततामाथि नै प्रश्न उठाएको उल्लेख गर्नुभयो।

जबरा पक्राउ प्रकरणमा सरकारले संसद् र जनतासमक्ष स्पष्ट जवाफ दिनुपर्ने माग गर्दै उहाँले राष्ट्रिय सभा अध्यक्षमार्फत प्रधानमन्त्री र गृहमन्त्रीलाई संसद्को कठघरामा उभ्याएर प्रश्न सोध्नुपर्ने बताउनुभयो।