ज्येष्ठ नागरिकको ज्ञान र सीप नयाँ पुस्तामा हस्तान्तरण गर्न ‘ज्येष्ठ नागरिक अनुभव बैंक’ निर्माण गरिने

काठमाडौँ, असोज १५ गते । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयले ज्येष्ठ नागरिकसँग जीवनभर सञ्चित ज्ञान, सीप, अनुभव र जीवनका सिकाइलाई संरक्षण गरी नयाँ पुस्तासम्म हस्तान्तरण गर्ने उद्देश्यले ‘ज्येष्ठ नागरिक अनुभव बैंक’ निर्माण तथा विकासको प्रक्रिया अघि बढाएको छ। छत्तिसौँ अन्तर्राष्ट्रिय ज्येष्ठ नागरिक दिवसका अवसरमा मन्त्रालयले यो नयाँ अवधारणा अघि सारेको हो।

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीका अनुसार ज्येष्ठ नागरिकलाई केवल हेरचाह र संरक्षण आवश्यक पर्ने समूहका रूपमा नभई राष्ट्रका ज्ञान, सीप र अनुभवका अमूल्य स्रोतका रूपमा स्थापित गर्न यो कदम चालिएको हो। ती अनुभवहरूको संरक्षण, अभिलेखीकरण र पुस्तान्तरणलाई संस्थागत रूप दिन डिजिटल प्रविधिको उपयोग गरिनेछ।

ज्येष्ठ नागरिकले कृषि, उद्यम, पेसा, शिक्षा, प्रशासन, कला–संस्कृति तथा परम्परागत ज्ञानका क्षेत्रमा आर्जन गरेका अनुभवहरूलाई डिजिटल रूपमा सुरक्षित राखिनेछ। यस अनुभव बैंकमार्फत विद्यार्थी, युवा तथा नयाँ पुस्ताले ज्येष्ठ नागरिकको ज्ञान र जीवनका सिकाइबाट निःशुल्क रूपमा सिक्न र मार्गदर्शन लिनसक्ने माध्यमका रूपमा यसलाई विकास गर्ने मन्त्रालयको सोच रहेको छ।

मन्त्री बादीले बदलिँदो पारिवारिक संरचना, बसाइँसराइ र सहरीकरणका कारण ज्येष्ठ नागरिकहरूमा एक्लोपन र सामाजिक सहभागिताका चुनौतीहरू देखिएकाले उहाँहरूको जीवनलाई मर्यादित, सुरक्षित र अर्थपूर्ण बनाउनु राज्य, समाज र परिवारको साझा दायित्व भएको बताउनुभयो।