नेपाली कांग्रेसको १५औँ महाधिवेशन: वडा अधिवेशनमा सक्रिय सहभागी हुन पूर्वसभापति शेरबहादुर देउवाको अपिल

काठमाडौँ, असोज १५ गते । नेपाली कांग्रेसका पूर्वसभापति शेरबहादुर देउवाले पार्टीको १५औँ महाधिवेशनअन्तर्गत बिहीबार हुन लागेको वडा अधिवेशनमा सक्रिय रूपमा सहभागी हुन देशभरका कांग्रेस नेता तथा कार्यकर्ताहरूलाई हार्दिक अपिल गर्नुभएको छ।

देउवा पक्षीय समूहको १५औँ महाधिवेशनअन्तर्गत आज देशभरका वडाहरूमा एकैसाथ वडा अधिवेशन भइरहेको सन्दर्भमा पूर्वसभापति देउवाले उक्त आह्वान गर्नुभएको हो। उहाँले पार्टीको महाधिवेशनलाई भव्य र हर्षोल्लासका साथ सम्पन्न गर्न सबै सदस्यहरूलाई आग्रह गर्नुभएको छ।

नेपालमा लोकतान्त्रिक गणतन्त्रात्मक शासन व्यवस्था, पूर्ण प्रेस स्वतन्त्रता र विधिको शासन स्थापनाका लागि नेपाली कांग्रेसले आठ दशकदेखि ठुलो बलिदान र सङ्घर्ष गरेको स्मरण गर्दै पूर्वसभापति देउवाले पार्टीको १५औँ महाधिवेशन ऐतिहासिक र निकै महत्त्वपूर्ण रहेको उल्लेख गर्नुभएको छ।

उहाँले जारी गर्नुभएको अपिलमा देशभरका छ हजार ७४३ वटै वडाहरूमा विधि र प्रक्रिया पूरा गरेर सुरु हुन लागेको अधिवेशनलाई सफलताका साथ सम्पन्न गर्न भनिएको छ। कांग्रेस संस्थापन पक्षको महाधिवेशन आगामी असोज १८ गतेदेखि सुरु हुँदैछ भने इतर पक्षको महाधिवेशन आगामी मङ्सिर २१ गतेदेखि हुने तय गरिएको छ।