असोज १६ गतेदेखि सङ्घीय संसद्को चालु अधिवेशन अन्त्य गर्न मन्त्रीपरिषद्को सिफारिस

काठमाडौँ, असोज १५ गते । मन्त्रीपरिषद्को मङ्गलबार बसेको बैठकले सङ्घीय संसद्को चालु अधिवेशन अन्त्यका लागि राष्ट्रपतिसमक्ष सिफारिस गरेको छ। नेपालको संविधान अनुसार संसद् अधिवेशनको आह्वान र अन्त्य मन्त्रीपरिषद्को सिफारिसमा राष्ट्रपतिबाट हुने संवैधानिक व्यवस्था रहेको छ।

कानुन, न्याय तथा संसदीय मामिलामन्त्री सोविता गौतमले आगामी असोज १६ गतेदेखि लागू हुने गरी चालु अधिवेशन अन्त्यका लागि राष्ट्रपतिसमक्ष सिफारिस गरिएको जानकारी दिनुभयो। गत वैशाख २८ गतेबाट सुरु भएको यो अधिवेशनले सरकारको नीति तथा कार्यक्रम र वार्षिक बजेट पारित गरेको थियो।

यस अधिवेशन अवधिभर अध्यादेश प्रतिस्थापनका छ वटा विधेयक पारित भई प्रमाणीकरण भइसकेका छन्। साथै, वैकल्पिक वित्त परिचालन विधेयक, नेपाल विशेष सेवा ऐन, २०४२ को साबिकको व्यवस्था जगाउने विधेयक तथा सहिद दशरथ चन्द स्वास्थ्य विज्ञान विश्वविद्यालय विधेयकसमेत पारित भई प्रमाणीकरण भएका छन्। प्रतिनिधि सभाका विभिन्न समितिहरूमा अझै १० भन्दा बढी विधेयकहरू विचाराधीन अवस्थामै रहेका छन्।

यस अधिवेशनमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपत्सम्बन्धी अध्ययनका लागि विशेष समिति गठन गरिएको छ। अधिवेशनका क्रममा प्रधानमन्त्री वालेन्द्र शाहले आकस्मिक प्रश्नोत्तरमा भाग लिनुभएको थियो भने परराष्ट्र, भूमि व्यवस्था, सङ्घीय मामिला, पूर्वाधार र उद्योगमन्त्रीहरूसँग पनि सांसदहरूको प्रत्यक्ष प्रश्नोत्तर भएको थियो।