नवनियुक्त पाँच देशका राजदूतद्वारा राष्ट्रपति रामचन्द्र पौडेलसमक्ष ओहोदाको प्रमाणपत्र पेस

काठमाडौँ, असोज १४ गते । नेपालका लागि नवनियुक्त पाँच देशका आवासीय राजदूतहरूले राष्ट्रपति रामचन्द्र पौडेलसमक्ष आफ्नो ओहोदाको प्रमाणपत्र पेस गर्नुभएको छ। राष्ट्रपति भवन शीतल निवासमा आज आयोजना गरिएको छुट्टाछुट्टै विशेष समारोहमा राजदूतहरूले ओहोदाको प्रमाणपत्र पेस गर्नुभएको हो।

ओहोदाको प्रमाणपत्र पेस गर्नेहरूमा थाइल्यान्डका राजदूत डोनावित पुल्सावात, सङ्घीय गणतन्त्र ब्राजिलका राजदूत क्लाउडियो राजा गाबाग्लिया लिन्स, र इस्लामिक गणतन्त्र पाकिस्तानका राजदूत मोहम्मद आमिर खान रहनुभएको छ।

यसै गरी फ्रान्सका राजदूत फ्रान्स्वाज पुइग–इन्जा र गणतन्त्र कोरिया (दक्षिण कोरिया) का राजदूत पार्क जे–क्युङले पनि आजै राष्ट्रपतिसमक्ष आफ्नो ओहोदाको प्रमाणपत्र पेस गर्नुभएको राष्ट्रपति कार्यालयले जनाएको छ।

विशेष समारोहमा नेपाल सरकारका उच्च पदस्थ अधिकारीहरूको उपस्थिति रहेको थियो। नवनियुक्त राजदूतहरूलाई लाजिम्पाटदेखि राष्ट्रपति भवनसम्म रिसल्लासहितको बग्गीमा सम्मानपूर्वक सवारी गराइएको राष्ट्रपति कार्यालयका प्रवक्ता कृष्णबहादुर शाहीद्वारा जारी विज्ञप्तिमा उल्लेख छ।