सांसदहरूलाई विज्ञताअनुसार मुलुकको विकासमा योगदान दिन प्रधानमन्त्री वालेन्द्र शाहको आग्रह

काठमाडौँ, असोज १४ गते । प्रधानमन्त्री वालेन्द्र शाहले संघीय संसद् प्रतिनिधिसभामा प्रतिनिधित्व गर्नुहुने प्राविधिक पृष्ठभूमिका सांसदहरूलाई आफ्नो विज्ञता र ज्ञानको अधिकतम उपयोग गरी मुलुकको विकासमा योगदान दिन आग्रह गर्नुभएको छ।

बुधबार सिंहदरबारस्थित प्रधानमन्त्री तथा मन्त्रीपरिषद्को कार्यालयमा आयोजित छलफलका क्रममा उहाँले यस्तो आग्रह गर्नुभएको हो।

छलफलका क्रममा प्रधानमन्त्री शाहले सांसदहरूलाई केवल राजनीतिक विषयमा मात्र सीमित नभई दीर्घकालीन नीति निर्माण र नयाँ विचारहरूमा केन्द्रित हुन सुझाव दिनुभयो। उहाँले प्राविधिक विषयमा जानकार व्यक्तिहरू नीति निर्माणको माथिल्लो तहमा भएकाले आफ्ना ज्ञान, सीप र अनुभव देश विकासका लागि लगाउनुपर्नेमा जोड दिनुभयो।

प्रधानमन्त्री शाहले निर्वाचन वा राजनीतिक गतिविधिका बेला पार्टी राजनीतिमा सक्रिय हुनु स्वाभाविक भए पनि अन्य समयमा प्राविधिक दक्षता र व्यावसायिक पहिचानलाई प्राथमिकतामा राख्नुपर्ने बताउनुभयो। देश निर्माणका लागि प्राविधिक रूपमा दक्ष जनप्रतिनिधिको भूमिका महत्त्वपूर्ण हुने उहाँको भनाइ थियो।

सांसदहरूलाई ‘असाधारण’ क्षमता भएका व्यक्ति भनेर सम्बोधन गर्दै प्रधानमन्त्री शाहले त्यस्ता व्यक्तिहरूले नयाँ उपाय र सोचसहित काम गरे आगामी पाँच वर्षमा मुलुकले विकासको फड्को मार्ने विश्वास व्यक्त गर्नुभयो।