संयुक्त राष्ट्रसङ्घको ८१औँ महासभामा नेपालको सहभागिता उपलब्धिमूलक, कूटनीतिक छवि उच्च भयो: परराष्ट्रमन्त्री शिशिर खनाल

काठमाडौँ, असोज १४ गते । परराष्ट्रमन्त्री शिशिर खनालले संयुक्त राष्ट्रसङ्घको ८१औँ महासभामा नेपालको सहभागिताले देशको हितका लागि महत्त्वपूर्ण उपलब्धि हासिल गरेको बताउनुभएको छ।

महासभाको बैठकमा भाग लिई स्वदेश फर्कने क्रममा त्रिभुवन अन्तर्राष्ट्रिय विमानस्थलमा सञ्चारकर्मीहरूसँग कुराकानी गर्दै मन्त्री खनालले नेपालको कूटनीतिक छविलाई उच्च बनाउन र विश्व समुदायको ध्यानाकर्षण गराउन नेपाल सफल भएको स्पष्ट पार्नुभयो।

मन्त्री खनालले महासभाका क्रममा प्रधानमन्त्री वालेन्द्र शाहले गर्नुभएको सम्बोधन तथा विभिन्न द्विपक्षीय र बहुपक्षीय बैठकहरूमा नेपालले प्रस्तुत गरेको धारणाप्रति विश्व समुदाय सकारात्मक रहेको बताउनुभयो। प्रधानमन्त्री शाहको सम्बोधन राष्ट्रसङ्घीय महासभामा अहिले सबैभन्दा बढी हेरिएका सम्बोधनहरूमध्ये परेको भन्दै यसले नेपालप्रति अन्तर्राष्ट्रिय चासो बढाएको उहाँले उल्लेख गर्नुभयो।

महासभाका क्रममा ३३ भन्दा बढी द्विपक्षीय भेटवार्ताहरू भएको जानकारी दिँदै मन्त्री खनालले यसबाट नेपालको कूटनीतिक सम्बन्धलाई थप मजबुत बनाउन सहयोग पुग्ने विश्वास व्यक्त गर्नुभयो। आगामी दिनमा नेपालको कूटनीतिलाई थप सशक्त बनाई राष्ट्रहित प्रवर्द्धन गर्न स्पष्ट आधारहरू तयार भएको उहाँको भनाइ थियो।

नेपालका तर्फबाट जलवायु न्याय, भोटेकोशीको विनाशकारी बाढी तथा अन्य राष्ट्रिय र अन्तर्राष्ट्रिय मुद्दाहरूलाई महासभामा बलियोसँग उठाइएको उहाँले बताउनुभयो। जलवायु परिवर्तनले नेपाल जस्ता प्रभावित मुलुकहरूलाई पारेको असरबारे स्पष्ट धारणा राखिएको र नेपालको राष्ट्रिय हितलाई नै केन्द्रमा राखेर कार्य सम्पन्न गरी फर्किएको मन्त्री खनालले जानकारी दिनुभयो।