अन्तर्राष्ट्रिय प्रतियोगितामा पदक जित्न खेलकुदमा तल्लो तहदेखि दीर्घकालीन लगानी आवश्यक: मन्त्री सस्मित पोखरेल

काठमाडौँ, असोज १४ गते । शिक्षा तथा खेलकुदमन्त्री सस्मित पोखरेलले एसियाली खेलकुदसहित ठूला अन्तर्राष्ट्रिय प्रतियोगितामा अपेक्षित नतिजा हासिल गर्न खेलकुदको तल्लो (ग्रासरुट) तहदेखि दीर्घकालीन लगानी आवश्यक रहेको बताउनुभएको छ।

मन्त्रिपरिषद्का निर्णय सार्वजनिक गर्न आयोजित पत्रकार सम्मेलनमा सरकारका प्रवक्तासमेत रहनुभएका मन्त्री पोखरेलले विगतमा ग्रासरुट तहमा पर्याप्त लगानी हुन नसक्दा नेपालको प्रदर्शन कमजोर भएको स्पष्ट पार्नुभयो।

मन्त्री पोखरेलले खेलकुदमा आज लगानी गरेर भोलि नै नतिजा वा पदक प्राप्त नहुने भन्दै यसका लागि दीर्घकालीन योजना र बजेट आवश्यक पर्ने बताउनुभयो। उहाँले खेलकुद पूर्वाधार विकासका लागि सहरी विकास मन्त्रालय र राष्ट्रिय खेलकुद परिषद्बिच सम्झौता भई देशका २७ स्थानमा कभर्ड हल, क्रिकेट तथा फुटबल रङ्गशालालगायत पूर्वाधार निर्माण अघि बढाइएको जानकारी दिनुभयो।

यसैगरी, विभिन्न प्रतियोगितामा सफलता हासिल गरेका खेलाडीहरूलाई घोषित नगद पुरस्कार उपलब्ध गराउन अर्थ मन्त्रालयसँग समन्वय गरी आर्थिक स्रोत सुनिश्चित गरिएको मन्त्री पोखरेलले बताउनुभयो। उहाँले वर्षौँदेखि रोकिएका घरेलु लिग सञ्चालनका लागि खेलाडीहरूसँग छलफल गरी आवश्यक तयारी भइरहेकोसमेत जानकारी दिनुभयो।

निजी क्षेत्रको लगानीमा आयोजना हुने नेपाल सुपर लिग (एनएसएल) लगायतका ‘फ्रेन्चाइज’ तथा ‘कप मोडल’ का प्रतियोगिताहरू सञ्चालनका लागि सरकार पूर्ण रूपमा सकारात्मक रहेको र आवश्यक सहजीकरण गर्न तयार रहेको मन्त्री पोखरेलले स्पष्ट पार्नुभयो।