अब पदका हिसाबले माथि जाने ठाउँ छैन, जनता र राष्ट्रको सेवामा समर्पित रहन्छु: विद्यादेवी भण्डारी

सिद्धार्थनगर, असोज १३ गते । पूर्वराष्ट्रपति एवं नेकपा (एमाले)की वरिष्ठ नेता विद्यादेवी भण्डारीले आगामी दिनमा आफू पार्टी, जनता र राष्ट्रको सेवामा निरन्तर समर्पित भएर अघि बढ्ने बताउनुभएको छ।

एमालेले असोज ८ गते उहाँलाई वरिष्ठ नेताको जिम्मेवारी दिने निर्णय गरेपछि रुपन्देहीमा आयोजित बधाई तथा सम्मान कार्यक्रममा सम्बोधन गर्दै भण्डारीले पार्टीको निर्णय स्वीकार गरेको स्पष्ट पार्नुभयो।

कार्यक्रममा बोल्दै पूर्वराष्ट्रपति भण्डारीले भन्नुभयो, “अब यहाँभन्दा माथि जाने ठाउँ छैन, राष्ट्रपति भइसकेँ। अब जाने भनेको स्वर्ग हो, तर राष्ट्र र जनताका लागि काम गर्ने इच्छा अझै बाँकी रहेकाले यही पार्टीमा रहेर काम गर्छु।” उहाँले बाल्यकालदेखि नै एमालेमा आबद्ध भएर सामाजिक सेवा र कुरीतिविरुद्धको अभियानमा योगदान पुर्‍याएको स्मरण गराउनुभयो।

पार्टी नेतृत्वबाट भएका गल्ती तथा कमजोरीहरूलाई स्वीकार गर्दै सच्याएर अघि बढ्नुपर्नेमा उहाँले जोड दिनुभयो। विगतमा भएका पार्टी विभाजनले एमालेसहित समग्र वाम आन्दोलनमा ठूलो असर र राजनीतिक क्षति पुर्‍याएको उल्लेख गर्दै उहाँले २०७४ सालको निर्वाचनमा वाम एकताबाट प्राप्त सफलतालाई बिर्सन नहुने बताउनुभयो।

एउटा निर्वाचनको परिणामलाई मात्र आधार बनाएर निराश हुनुपर्ने अवस्था नरहेको बताउँदै भण्डारीले एमाले नै देशभक्ति र सामाजिक न्यायको मूल विकल्प भएको दाबी गर्नुभयो। उहाँले राष्ट्रिय स्वाभिमान जोगाउन र नेपाली जनताको जीवनस्तर सुधार गर्ने काममा सबै एकताबद्ध भएर लाग्नुपर्नेमा जोड दिनुभयो।