जनताको साथबाट बनेको सरकारलाई कांग्रेसले डिस्टर्ब गर्दैन: भीष्मराज आङ्देम्बे

फिदिम, असोज १२ गते । नेपाली कांग्रेस संसदीय दलका नेता भीष्मराज आङ्देम्बेले जनताको अद्भूत साथ र समर्थनबाट गठन भएको सरकारलाई नेपाली कांग्रेसले कहिल्यै डिस्टर्ब नगर्ने स्पष्ट पार्नुभएको छ। विगतमा दुई-तिहाइ नजिकका सरकार ढाल्ने र आफू अनुकूल बनाउने खेलले नागरिकमा संसदीय प्रणाली र दलहरूप्रति नै वितृष्णा पैदा गरेको उहाँको भनाइ थियो।

नेपाली कांग्रेस पाँचथरको प्रदेश सभा ‘क’ र ‘ख’ को संयुक्त अधिवेशनको उद्घाटन सत्रमा सम्बोधन गर्दै आङ्देम्बेले प्रतिपक्षमा बसेर सरकारका सकारात्मक काममा सदैव साथ दिने बताउनुभयो। उहाँले ‘जेन-जी’ आन्दोलनको मर्म अनुसार गठन भएको वर्तमान सरकारलाई पाँच वर्षसम्म निर्बाध रूपमा काम गर्न दिनुपर्ने र कतैबाट बाधा पुर्‍याउन नहुने टिप्पणी गर्नुभयो।

नेपाली कांग्रेस सत्ता प्राप्तिका लागि मात्र नभई देश निर्माणका लागि बनेको पार्टी भएको उल्लेख गर्दै उहाँले अब रचनात्मक प्रतिपक्षको भूमिका निर्वाह गर्दै देश बनाउन लाग्ने बताउनुभयो। साथै, नेपाली कांग्रेसको १४औँ/१५औँ महाधिवेशन र विधानले युवा पुस्तालाई नेतृत्वमा स्थापित गर्न ठूलो अवसर दिएको उहाँले दाबी गर्नुभयो।

पार्टीको आगामी नेतृत्वबारे बोल्दै नेता आङ्देम्बेले अब कांग्रेसको नेतृत्वमा गगन थापा र विश्वप्रकाश शर्माको विकल्प नरहेको बताउनुभयो। अबको १५ वर्षपछि पुराना पुस्ताले विश्राम लिनुपर्ने र युवा पुस्ताले नै देशको नेतृत्व सम्हाल्ने उहाँले उल्लेख गर्नुभयो।

सोमबारबाट सुरु भएको पाँचथरको क्षेत्रीय अधिवेशनमा मंगलबार मतदान प्रक्रिया हुने कार्यतालिका रहेको छ।