प्रतिनिधिसभाद्वारा महिला, बालबालिका तथा सामाजिक सुरक्षासम्बन्धी विधेयकमाथि विचार गरियोस् भन्ने प्रस्ताव सर्वसम्मतिले स्वीकृत

काठमाडौँ, असोज १२ गते । प्रतिनिधिसभाको बैठकले ‘महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षासम्बन्धी केही नेपाल ऐन संशोधन गर्ने विधेयक, २०८३ माथि विचार गरियोस् भन्ने प्रस्ताव’ सर्वसम्मतिले स्वीकृत गरेको छ। प्रतिनिधिसभाको आजको बैठकमा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले सो प्रस्ताव प्रस्तुत गर्नुभएको हो।

प्रस्ताव प्रस्तुत गर्दै मन्त्री सीता बादीले मन्त्रालयको नाम परिवर्तनसँगै सामाजिक सुरक्षाको जिम्मेवारीसमेत थपिएकाले कानुनी एकरूपता कायम गर्न विधेयक ल्याउनुपरेको स्पष्ट पार्नुभयो। छलफलमा भाग लिँदै राष्ट्रिय स्वतन्त्र पार्टीकी सांसद अफ्साना बानुले महिलाको सम्मान र सशक्तीकरणबिना राष्ट्रको समृद्धि असम्भव रहेको भन्दै विधेयकप्रति पूर्ण समर्थन जनाउनुभयो।

त्यस्तै राष्ट्रिय स्वतन्त्र पार्टीका सांसद यज्ञमणि न्यौपानेले विधेयकले नागरिकलाई राज्यबाट न्याय पाउने अनुभूति गराएको बताउनुभयो। नेपाली कम्युनिष्ट पार्टीका सांसद परशुराम तामाङले विधेयकको औचित्य र कारणमा प्रष्ट हुनुपर्ने धारणा राख्नुभयो भने नेकपा (एमाले) की सांसद टुकाभद्रा हमालले असहाय, अपाङ्गता भएका व्यक्ति र एकल महिलालाई सामाजिक सुरक्षा भत्ता निरन्तर दिनुपर्नेमा जोड दिनुभयो।

बैठकमा अन्य सांसदहरू अम्बिकादेवी सङ्ग्रौला, गणेशबहादुर विश्वकर्मा, ज्ञानु पौडेल, गुरुप्रसाद बराल, सुशीला ढकाल (आचार्य), साजिदा खातुन सिद्धिकी, लालविक्रम थापा, बिश्वराज पोखरेल र पार्वती विकले पनि विधेयकमाथि आफ्ना विचार प्रस्तुत गर्नुभएको थियो।