“पूर्वप्रधानन्यायाधीश चोलेन्द्र शम्शेर जबरालाई पक्राउ गरिएको होइन, सुरक्षाका लागि ल्याइएको हो”

काठमाडौँ, असोज ११ गते । पूर्वप्रधानन्यायाधीश चोलेन्द्र शम्शेर जबरालाई पक्राउ गरिएको नभई सुरक्षा संवेदनशीलतालाई ध्यानमा राखेर काठमाडौँ उपत्यका अपराध अनुसन्धान कार्यालयमा ल्याइएको नेपाल प्रहरीले स्पष्ट पारेको छ। कार्यालयका प्रमुख प्रहरी वरिष्ठ उपरीक्षक (एसएसपी) सन्तोष खड्काले जबरामाथि कुनै अभियोग वा पक्राउ आदेश नरहेको जानकारी दिनुभयो।

एसएसपी खड्काका अनुसार तत्कालको सुरक्षा अवस्थालाई मूल्याङ्कन गरी उहाँको सुरक्षा व्यवस्थापनका लागि मात्र कार्यालयमा ल्याइएको हो। “उहाँको सुरक्षाका लागि नै तत्काल यहाँ ल्याइएको हो, अब थप निर्णय भएपछि सोही अनुसार सुरक्षा प्रदान गरिनेछ,” उहाँले बताउनुभयो। यसअघि बिहान निवासबाटै नियन्त्रणमा लिइएको भन्दै समाचार सार्वजनिक भएपछि प्रहरीले यसबारे स्पष्टीकरण दिएको हो।

नेपालको न्यायपालिकाको नेतृत्व गरिसक्नुभएका जबरा २०७५ पुसमा प्रधानन्यायाधीश नियुक्त हुनुभएको थियो। कार्यकाल विवादित बनेपछि २०७८ फागुन १ गते प्रतिनिधिसभामा उहाँविरुद्ध महाभियोग प्रस्ताव दर्ता भई निलम्बनमा पर्नुभएको थियो। उहाँविरुद्धको महाभियोगसँग सम्बन्धित रिटमाथि सर्वोच्च अदालतको संवैधानिक इजलासले हालै फैसला गर्दै महाभियोगको औचित्य समाप्त भएको ठहरसहित रिट खारेज गरिसकेको छ।

२०५३ सालमा तत्कालीन पुनरावेदन अदालतको न्यायाधीशबाट न्यायिक यात्रा सुरु गर्नुभएका जबरा सर्वोच्च अदालतको न्यायाधीश हुँदै प्रधानन्यायाधीश बन्नुभएको थियो। प्रहरीका अनुसार जबराको सुरक्षा अवस्थाको थप मूल्याङ्कन गरेपछि उहाँलाई कहाँ र कस्तो सुरक्षा व्यवस्था उपलब्ध गराउने भन्नेबारे अन्तिम निर्णय लिइनेछ।