२०औँ एसियन गेम्स: महिला कबड्डीमा नेपाललाई कास्य पदक, सेमिफाइनलमा भारतसँग पराजित

काठमाडौँ, असोज ९ गते । जापानमा जारी २०औँ एसियन गेम्स अन्तर्गत महिला कबड्डीको सेमिफाइनलमा नेपाली टोली भारतसँग पराजित भएको छ। तोकाइ सिटिजन व्यायामशालामा भएको प्रतिस्पर्धात्मक खेलमा नेपाली टोली भारतसँग ४८-२४ को फराकिलो अन्तरले पराजित हुँदै कास्य पदकमै चित्त बुझाउन बाध्य भएको हो।

खेलको सुरुआतदेखि नै दबाब बनाएको भारतले पहिलो हाफमा ३१-१७ को अग्रता लिएको थियो। दोस्रो हाफमा पनि लय कायम राख्दै भारतले १७-७ को जित दर्ता गर्दै फाइनलमा प्रवेश गर्यो। यससँगै नेपाली महिला कबड्डी टोलीले लगातार दोस्रो संस्करणमा कास्य पदक हात पारेको छ।

नेपालले समूह चरणको पहिलो खेलमा थाइल्यान्डलाई हराएको थियो भने चाइनिज ताइपेइसँग पराजित भएको थियो। समूह चरणको अन्तिम तथा निर्णायक खेलमा श्रीलङ्कालाई पराजित गर्दै नेपालले सेमिफाइनलमा स्थान पक्का गर्नुका साथै कास्य पदक सुरक्षित गरेको थियो। यसअघि १९औँ एसियन गेम्सको सेमिफाइनलमा पनि नेपाल भारतसँगै पराजित भएको थियो।

जारी २०औँ एसियन गेम्समा नेपालका लागि यो दोस्रो पदक हो। यसअघि पुरुष करातेतर्फको कुमिते ८४ केजी समूहमा तेन्जिङ शेर्पाले कास्य पदक जितेका थिए।