11/18/2026, 02:16:52
मङ्गलबार, मङि्सर ०२, २०८३

सामाजिक संघ-संस्थाको योगदान प्रभावकारी र पारदर्शी बनाउनुपर्छ: मन्त्री सीता बादी

FILE PHOTO - SETOPRESS.COM
©FILE PHOTO - SETOPRESS.COM

काठमाडौं, असोज ६ गते । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री एवं समाज कल्याण परिषद्की अध्यक्ष सीता बादीले सामाजिक संघसंस्थाको योगदानलाई थप प्रभावकारी, समन्वयित, पारदर्शी र दिगो बनाउनुपर्नेमा जोड दिनुभएको छ।

परिषद्को ४९ औँ स्थापना दिवस तथा ४७ औँ सामाजिक सेवा दिवसका अवसरमा शुभकामना सन्देश जारी गर्दै मन्त्री बादीले सेवाभावलाई केन्द्रमा राखी विशेषगरी ग्रामीण तथा सीमान्तकृत समुदायलाई लक्षित गरेर कार्यक्रम सञ्चालन गर्न आग्रह गर्नुभएको छ।

नेपाल सरकारका नीति तथा प्राथमिकताहरूसँग समन्वय गरी सामाजिक संघसंस्थाका प्रयासहरूलाई दिगो विकासका लक्ष्यअनुरूप परिणाममुखी बनाउनुपर्नेमा उहाँले विशेष जोड दिनुभएको छ। शिक्षा, स्वास्थ्य, सीप विकास, अपाङ्गता भएका व्यक्ति, वातावरण, र कृषि जस्ता विविध क्षेत्रमा गैरसरकारी संस्थाहरूले पुर्‍याएको योगदानको चर्चा गर्दै मन्त्री बादीले रसुवा-भोटेकोशी विपद्का बेला राहत र पुनरस्थापनामा उनीहरूले खेलेको भूमिकाको उच्च प्रशंसा गर्नुभएको छ।

परिषद्को सेवा प्रवाहलाई थप छिटोछरितो र प्रभावकारी बनाउन डिजिटाइजेसन प्रक्रियामा लैजानुपर्ने आवश्यकता उहाँले औँल्याउनुभएको छ। डिजिटल सेवा विस्तार भएसँगै सेवाग्राहीहरूले सामान्य कामका लागि पनि टाढा-टाढाबाट काठमाडौँ धाउनुपर्ने बाध्यताको अन्त्य भई परिषद्का सेवाहरू सहज रूपमा नागरिकको पहुँचसम्म पुग्ने उहाँले विश्वास व्यक्त गर्नुभएको छ।

मन्त्री बादीले कार्यक्रम स्वीकृति, सहजीकरण, अनुगमन, मूल्याङ्कन तथा अभिलेख व्यवस्थापनलाई थप पारदर्शी र व्यवस्थित बनाउनुपर्ने बताउनुभएको छ। स्थापना दिवसलाई सबै समाजसेवी तथा संघसंस्थाहरूले आफ्ना कामको समीक्षा र स्वमूल्याङ्कन गर्ने अवसरका रूपमा उपयोग गर्दै आगामी दिनमा सामाजिक विकासका कार्यहरू अझ जनमुखी र परिणाममुखी बनाउन शुभकामना दिनुभएको छ।

क्रम संख्या मुख्य विषय विवरण तथा कारण
१ विशेष अवसर समाज कल्याण परिषद्को ४९ औँ स्थापना दिवस तथा ४७ औँ सामाजिक सेवा दिवस।
२ मुख्य प्राथमिकता सामाजिक संघसंस्थाहरूको कार्यलाई प्रभावकारी, पारदर्शी, दिगो र ग्रामीण/सीमान्तकृत लक्षित बनाउनु।
३ डिजिटाइजेसनमा जोड काठमाडौँ धाउनुपर्ने बाध्यता अन्त्य गरी परिषद्का सेवाहरू नागरिकको सीधा पहुँचमा पुर्‍याउन।
४ विपद् व्यवस्थापनको प्रशंसा रसुवा-भोटेकोशी विपद्मा राहत व्यवस्थापन तथा पुनरस्थापनामा गैरसरकारी क्षेत्रले पुर्‍याएको योगदान।