प्रतिनिधिसभाको बैठक अपराह्न १ बजे बस्दै: नागरिक लगानी कोष विधेयक प्रस्तुत हुने, चार संसदीय समितिको पनि बैठक

काठमाडौँ, असोज ६ गते । सङ्घीय संसद्, प्रतिनिधिसभाको बैठक असोज ६ गते मङ्गलबार अपराह्न १ बजे बस्दैछ। आजको बैठकमा अर्थमन्त्री डा. स्वर्णिम वाग्लेले ‘नागरिक लगानी कोष (तेस्रो संशोधन) विधेयक, २०८३ माथि विचार गरियोस्’ भन्ने प्रस्ताव प्रस्तुत गर्ने कार्यसूची रहेको छ।

प्रतिनिधिसभा बैठकका अलावा आज विभिन्न चार वटा संसदीय समितिहरूसमेत क्रियाशील रहनेछन्। सङ्घीय संसद् सचिवालयका अनुसार अर्थसमिति, शिक्षा, स्वास्थ्य तथा सूचना प्रविधि समिति, विकास, आर्थिक मामिला तथा सुशासन समिति र सार्वजनिक नीति तथा प्रत्यायोजित विधायन समितिको बैठक आयोजना गरिएको छ।

बिहान १० बजे बस्ने अर्थसमितिमा ‘अर्थसम्बन्धी केही नेपाल कानुनलाई संशोधन र खारेज गर्न बनेको विधेयक’ माथि संशोधनकर्ता सांसदहरूसँग सैद्धान्तिक छलफल हुनेछ। सोही समयमा बस्ने स्वास्थ्य तथा सूचना प्रविधि समितिमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ को मस्यौदा प्रतिवेदनमाथि छलफल चल्नेछ।

त्यसैगरी, विकास समितिमा स्वदेशी/विदेशी लगानी, जलवायु परिवर्तनको प्रभाव र लगानी सम्मेलनबारे बिहान ११:१५ बजे छलफल हुनेछ भने सार्वजनिक नीति समितिमा बिहान ११:३० बजे ‘पुस्तकालय नीति’ को मस्यौदाका सम्बन्धमा विज्ञहरूसँग विचार-विमर्श गरिनेछ।

आज बस्ने संसदीय समिति र कार्यसूचीको विवरण