जलवायु सङ्कट र जलवायु न्यायलाई नयाँ एजेण्डा बनाउने एमालेको निष्कर्ष: केन्द्रीय कमिटी बैठकमा अध्यक्ष ओलीको सम्बोधन

काठमाडौँ, असोज ५ गते । नेपाल कम्युनिष्ट पार्टी (एमाले) को सोमबारदेखि सुरु भएको तेस्रो केन्द्रीय कमिटी बैठकमा जलवायु परिवर्तनले निम्त्याएको सङ्कट र जलवायु न्यायका विषयमा गम्भीर चर्चा भएको छ। बैठकमा अध्यक्ष केपी शर्मा ओलीले जलवायु न्यायका लागि अन्तर्राष्ट्रिय निकायहरूसँग सशक्त रूपमा लबिङ बढाउनुपर्नेमा विशेष जोड दिनुभएको छ।

पूर्वप्रधानमन्त्रीसमेत रहनुभएका अध्यक्ष ओलीले दुई सय वर्षदेखि धनी राष्ट्रहरूले गरेको अन्धाधुन्ध औद्योगीकरण र प्राकृतिक स्रोतको दोहनका कारण नेपालजस्ता विकासशील राष्ट्रहरूले अकल्पनीय क्षति भोग्नुपरेको बताउनुभयो। गत भदौ १० गते भोटेकोशीमा आएको विनाशकारी बाढी यसकै जीवन्त दृष्टान्त भएको उल्लेख गर्दै उहाँले जलवायु सङ्कटको सामना गर्नु एमालेको मुख्य नयाँ एजेण्डा बनेको स्पष्ट पार्नुभयो।

विश्व राजनीति र समाजवादका सन्दर्भमा बोल्दै ओलीले रक्षात्मक अवस्थामा रहे पनि चीन, भियतनाम र क्युबाजस्ता देशहरूले आफ्नै विशेषता अनुसार समाजवाद निर्माण गरिरहेको बताउनुभयो। साथै, पार्टीभित्रको आलोचनालाई सकारात्मक रूपमा लिँदै गल्ती स्वीकारेर सुधार गर्ने नेतृत्वले नै सङ्गठनलाई सही दिशामा लैजान सक्ने उहाँको भनाइ थियो।

पार्टीभित्र उठिरहेको रुपान्तरण, हस्तान्तरण र पुस्तान्तरणको बहसबारे स्पष्ट पार्दै उहाँले एमालेको इतिहास जरा र नयाँ पुस्ता पालुवा भएको बताउनुभयो। हस्तान्तरण भनेको पद खाली गर्ने आकस्मिक घटना नभई जिम्मेवारी, ज्ञान र क्षमताको योजनाबद्ध प्रक्रिया भएको ओलीले उल्लेख गर्नुभयो। सोमबारदेखि सुरु भएको एमाले केन्द्रीय कमिटी बैठक असोज ७ गते बुधबारसम्म चल्नेछ।