नेपाली कांग्रेसको १५ औं महाधिवेशन: ६३ जिल्लामा वडा अधिवेशन पूर्ण, अन्य क्षेत्रमा पनि अन्तिम चरणमा

काठमाडौँ, असोज ५ गते । नेपाली कांग्रेस केन्द्रीय कार्यसमितिको निर्णयानुसार आगामी २०८३ असोज १६ देखि १९ गतेसम्म आयोजना हुन गइरहेको १५ औं केन्द्रीय महाधिवेशन अन्तर्गत तेस्रो दिन सोमबार पनि देशभर वडा अधिवेशन प्रक्रिया उत्साहप्रद रूपमा सम्पन्न भएको छ।

महाधिवेशनको कार्यतालिका अनुसार तल्लो तहका अधिवेशनहरूमा कार्यकर्ताहरूको उल्लेख्य सहभागिता देखिएको छ। अधिवेशनका क्रममा हालसम्म ६३ जिल्लाका वडा अधिवेशनहरू पूर्ण रूपमा सम्पन्न भइसकेका छन्।

ताप्लेजुङ, पाँचथर, इलाम, संखुवासभा, तेह्रथुम, धनकुटा, भोजपुर, खोटाङ, सोलुखुम्बु, उदयपुर, ओखलढुंगा, झापा, सुनसरी, बारा, दोलखा, रामेछाप, सिन्धुली, काभ्रेपलाञ्चोक र चितवन लगायतका जिल्लाहरूमा वडा तहको चुनावी तथा चयन प्रक्रिया सकिएको पार्टीले जनाएको छ।

यसैगरी, धनुषा, मोरङ, नवलपरासी, सप्तरी, सिरहा, रौतहट, सर्लाहीका निश्चित क्षेत्रहरूका साथै अछामका ३ वडा, डडेल्धुराका ४ वडा, रुपन्देहीका ३ वडा र महोत्तरीका ८ वडाहरूमा पनि अधिवेशन प्रक्रिया अन्तिम चरणमा पुगेको छ।

धादिङ, नुवाकोट लगायत हालसम्म अधिवेशन सम्पन्न हुन बाँकी रहेका अन्य जिल्ला र वडाहरूको अधिवेशन प्रक्रिया निरन्तर जारी रहने र छिट्टै सम्पन्न गरिने नेपाली कांग्रेसले जनाएको छ।