प्रतिनिधिसभामा ‘राष्ट्रिय सेवा दल विधेयक’ पेस: विद्यार्थीमा देशप्रेम र राष्ट्रिय एकता अभिवृद्धि हुने अपेक्षा

काठमाडौँ, असोज १ गते । प्रतिनिधिसभाको आजको बैठकमा ‘राष्ट्रिय सेवा दल विधेयकसम्बन्धी समितिको प्रतिवेदन, २०८३’ पेस गरिएको छ। राज्य व्यवस्था तथा सुशासन समितिका सभापति हरि ढकालले उक्त प्रतिवेदन सभासमक्ष पेस गर्नुभएको हो।

प्रतिवेदन पेस गर्दै सभापति ढकालले विद्यालयमा अध्ययनरत विद्यार्थीहरूमा देशप्रेम, जनसेवा र राष्ट्रिय एकताको भावना प्रवर्द्धन गर्न यो विधेयकले महत्त्वपूर्ण सघाउ पुर्‍याउने विश्वास व्यक्त गर्नुभयो। साथै, राष्ट्रिय आवश्यकताका आधारमा जुनसुकै नागरिकलाई राष्ट्र सेवामा खटाउन सकिने प्रावधानसमेत विधेयकमा समावेश गरिएको जानकारी दिनुभयो।

यसअघि ३० दफा रहेको उक्त विधेयकमाथि १३ जना सांसदले ७८ वटा संशोधन प्रस्ताव दर्ता गराउनुभएको थियो। समितिले ती प्रस्तावहरूमाथि छलफल गर्दै ९ वटा दफामा संशोधन र एउटा दफा परिमार्जन गरी विधेयकलाई सर्वसहमतिले पारित गरेर सभामा पेस गरेको हो।