संविधानको रक्षा र सुशासनका लागि परिवर्तनकारी शक्तिबिच एकता आवश्यक: माधवकुमार नेपाल

वीरगञ्ज, भदौ २७ गते । नेपाली कम्युनिष्ट पार्टी (नेकपा) का सहसंयोजक तथा पूर्वप्रधानमन्त्री माधवकुमार नेपालले संविधानको रक्षा र नागरिकका संवैधानिक अधिकार पूर्ण कार्यान्वयनका लागि परिवर्तनकारी शक्तिहरूबिच कार्यगत एकता हुनुपर्नेमा जोड दिनुभएको छ।

पर्साको वीरगञ्जमा आयोजित पत्रकार भेटघाट कार्यक्रममा बोल्दै उहाँले ठूलो सङ्घर्ष र बलिदानबाट प्राप्त लोकतन्त्र, सङ्घीयता, समावेशिता तथा मौलिक हकको संरक्षण गर्न दलहरूबिच सहकार्य र समन्वयको विकल्प नरहेको स्पष्ट पार्नुभयो।

सहसंयोजक नेपालले मधेसी, दलित, मुस्लिम, आदिवासी जनजाति, महिला, अपाङ्गता भएका व्यक्ति र पिछडिएका क्षेत्रका सीमान्तकृत समुदायको अधिकार संरक्षण गर्नु सबैको साझा दायित्व भएको बताउनुभयो। वर्तमान सरकारप्रति जनताको तीव्र आकाङ्क्षा रहेकाले सुशासनसहितको चुस्त सेवा प्रवाहमा केन्द्रित भएर काम गर्न उहाँले सरकारलाई सुझाव दिनुभयो।

साथै, उहाँले भदौ २३ र २४ गते भएको जेन-जी आन्दोलनका क्रममा घटेका घटनाहरूको निष्पक्ष छानबिन हुनुपर्ने माग समेत राख्नुभयो।

देशमा हालै आएको प्राकृतिक विपत्तिको प्रसङ्ग उल्लेख गर्दै पूर्वप्रधानमन्त्री नेपालले भदौ १० गते भोटेकोशीमा आएको बाढीका कारण ठूलो जनधनको क्षति भएको प्रति दुःख व्यक्त गर्नुभयो। उहाँले बेपत्ताहरूको खोजी, उद्धार तथा राहत कार्यमा सरकारले आफ्ना उपलब्ध स्रोतसाधनका साथै विभिन्न सङ्घसंस्था र राजनीतिक दलहरूलाई समेत प्रभावकारी रूपमा खटाउनुपर्नेमा जोड दिनुभयो।