विपत्तिको सामना गर्न सबैले एकता प्रदर्शन गर्दै राहत कार्यलाई तीव्र बनाउनुपर्छ : संयोजक प्रचण्ड

सिरहा, भदौ २५ गते । नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ ले भोटेकोशीमा आएको विपत्तिको सामना गर्न सबैले एकता प्रदर्शन गर्दै राहत कार्यलाई तीव्र बनाउनुपर्ने बताउनुभएको छ।

सिरहाको मिर्चैयास्थित दामोदरानन्द मोहन माध्यमिक विद्यालयमा आयोजित जिल्ला स्तरीय विज्ञान प्रदर्शनी तथा भवन उद्घाटन समारोहलाई सम्बोधन गर्दै उहाँले सो कुरा बताउनुभएको हो।

देश राष्ट्रिय शोकमा डुबेको यस परिस्थितिमा हिमाल, पहाड र तराई एक भई राहत सङ्कलनमा जुट्न उहाँले सबैमा आग्रह गर्नुभयो। रसुवा, नुवाकोट र धादिङमा भएको अपुरणीय क्षतिको समयमा मधेश प्रदेशले देखाएको सहयोगको संस्कृति सन्तोषजनक रहेको उल्लेख गर्दै उहाँले सरकारलाई सहमति र सहकार्यका लागि फराकिलो सोचका साथ प्रस्तुत हुन सुझाव दिनुभयो।

कार्यक्रममा मिर्चैया नगरपालिकाले शिक्षाको क्षेत्रमा गरेको लगानीको प्रशंसा गर्दै प्रचण्डले जलवायु न्यायका लागि नेपालले अन्तर्राष्ट्रिय मञ्चमा निरन्तर आवाज उठाउनुपर्नेमा जोड दिनुभयो। सो अवसरमा स्थानीय जनप्रतिनिधिहरूले मिर्चैयालाई शिक्षा, विज्ञान र उद्योगको केन्द्रका रूपमा विकास गर्न प्रचण्डको ध्यानाकर्षण गराउनुभएको थियो।