अमेरिकी बजारमा पेट्रोलको मूल्य कीर्तिमानी उकालो : हर्मुज अवरोध र इरान युद्धले उपभोक्तामाथि आर्थिक भार

वासिङ्टन, भदौ २३ गते । इरान युद्ध र हर्मुज जलडमरू मध्यबाट कच्चा तेलको ढुवानीमा आएको अवरोधका कारण अमेरिकामा पेट्रोलको मूल्य अहिलेसम्मकै उच्च स्तरमा पुगेको छ।

अमेरिकामा नियमित पेट्रोलको औसत मूल्य प्रति ग्यालोन चार दशमलव १४ अमेरिकी डलरसम्म पुगेर सन् २०१२ को कीर्तिमान (३.८२ डलर) समेत तोडेको छ। महँगो इन्धनका कारण अमेरिकी परिवारको लामो दूरीको यात्रा योजना प्रभावित हुनुका साथै दैनिक खर्चमा समेत थप आर्थिक दबाब परेको छ।

अमेरिका र इजरायलले फेब्रुअरीमा इरानमाथि आक्रमण गरेपछि तीव्र रूपमा बढेको इन्धनको मूल्य अझै पुरानो स्थितिमा फर्कन सकेको छैन। इरानले विश्वकै महत्वपूर्ण तेल ढुवानी मार्ग मानिने हर्मुज जलडमरूमध्य पुनः खोल्न अस्वीकार गर्दा अन्तर्राष्ट्रिय बजारमा कच्चा तेलको आपूर्तिमा ठूलो गिरावट आएको छ। आपूर्ति घट्दा कच्चा तेल महँगिएर त्यसको प्रत्यक्ष असर पेट्रोल र डिजेलको मूल्यमा परेको ऊर्जा वित्त विज्ञ टम सेङले बताउनुभएको छ।

बढ्दो महँगीलाई नियन्त्रण गर्न अमेरिकी ऊर्जा सचिव क्रिस राइटले सरकारले सम्भव भएसम्मका उपाय गरिरहेको बताए पनि चालकहरूले कहिलेसम्म राहत पाउनेछन् भन्नेबारे स्पष्ट समयसीमा दिनुभएको छैन। अन्तर्राष्ट्रिय तेल बजारमा युद्ध र सुरक्षा जोखिमको प्रभाव कायम रहेसम्म मूल्य नियन्त्रण गर्न कठिन हुने देखिएको छ। इन्धनको मूल्य वृद्धिले गाडी चलाउनेहरूलाई मात्र नभई सामान ढुवानीको लागतसमेत बढाएको छ।

अहिलेको मूल्य सन् २०२२ को जुनमा कायम भएको सर्वकालीन उच्च दर (प्रति ग्यालोन ५.०२ डलर) भन्दा कम भए पनि पछिल्लो वृद्धिले नागरिकको दैनिक जीवनमा ठूलो असर पारेको छ। खाद्यान्न तथा उपभोग्य वस्तुको ढुवानी खर्च बढ्दा समग्र महँगीमा थप दबाब सिर्जना भएको छ।

इरान युद्ध र हर्मुज जलडमरूमध्यको समस्या तत्काल समाधान नभए अमेरिकी उपभोक्ताहरूले अझै केही समय उच्च इन्धन मूल्यको सामना गरिरहनुपर्ने देखिन्छ।