काठमाडौँ महानगरको पत्राचार अब हुलाकबाट: गोश्वारा हुलाकसँग सम्झौता, ‘सेम डे’ डेलिभरी र द्रुत डाँक सेवा उपलब्ध

काठमाडौँ, असोज १७ गते । काठमाडौँ महानगरपालिकाले आफ्ना विभिन्न निकाय तथा व्यक्तिहरूलाई पठाइने पत्र, प्रतिवेदन, निमन्त्रणा, प्रमाणपत्र तथा पार्सललगायतका हुलाक वस्तुहरू पठाउन गोश्वारा हुलाक कार्यालय डिल्लीबजारसँग सम्झौता गरेको छ। महानगरबाट हुने पत्राचारलाई थप व्यवस्थित, सुरक्षित र तोकिएको समयभित्रै सम्बन्धित व्यक्ति वा निकायसम्म पुर्‍याउन यो सम्झौता गरिएको हो।

कामपा प्रशासन विभागका प्रमुख महेश काफ्लेका अनुसार महानगरका विभिन्न विभाग, महाशाखा, सचिवालय, एकाइ र आयोजनाहरूबाट चलानी हुने पत्रहरूलाई केन्द्रीय सम्पर्क एकाइमा सङ्कलन गरिनेछ। यसरी सङ्कलित पत्रहरू प्राप्तकर्ताको स्पष्ट ठेगाना र सम्पर्क विवरणसहित हुलाक कार्यालयलाई बुझाइनेछ, जसलाई हुलाकले आफ्ना डेलिभरी एजेन्टमार्फत हस्तान्तरण गरी भरपाइ महानगरलाई बुझाउनेछ।

सम्झौताअनुसार काठमाडौँ महानगरपालिका क्षेत्रभित्र अत्यन्त जरुरी २ किलोसम्मका पत्र वा पार्सलका लागि ‘सेम डे’ (उही दिन) डेलिभरी सेवा उपलब्ध हुनेछ। यसबाहेक २ किलोसम्मका सामानका लागि रजिस्ट्री सेवा, आवश्यकता अनुसार द्रुत डाँक सेवा (EMS) तथा पार्सल सेवा प्रयोग गरिनेछ। रजिस्ट्री र पार्सलतर्फका वस्तुहरू अर्को दिन वितरण गर्ने व्यवस्था गरिएको छ।

ललितपुर, भक्तपुर र काठमाडौँका अन्य स्थानीय तहका हकमा रजिस्ट्री सेवामार्फत अर्को दिन हस्तान्तरण गरी सोही दिन वा भोलिपल्टसम्म वितरण गरिनेछ भने अन्य जिल्लाका लागि हुलाकको प्रचलित डाँक तालिकाअनुसार पठाइनेछ। हुलाक वस्तु हराउने वा टुटफुट हुने जोखिम न्यूनीकरणका लागि महानगरले सुरक्षित प्याकेजिङ गर्ने र हुलाकले सावधानी अपनाउने सर्तसहित यो सम्झौता एक वर्षका लागि लागू गरिएको छ।