जलवायु परिवर्तन तथा भोटेकोशी–त्रिशूली विपद्‌सम्बन्धी संसदीय विशेष समितिद्वारा कार्यविधि पारित

काठमाडौँ, असोज १६ गते । हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिले आफ्नो कार्यविधि सर्वसम्मतिले पारित गरेको छ। समितिको असोज १५ गते बसेको बैठकले कार्यविधि पारित गर्दै आगामी कामको दिशा तय गरेको हो।

समितिका सदस्य एवं सांसद अनुष्का श्रेष्ठका अनुसार कार्यविधि पारित भएसँगै समितिको कार्यक्षेत्र र दायरा अझ स्पष्ट भएको छ। समितिले हिमाली क्षेत्रका समुदायदेखि जलवायु जोखिममा रहेका नदी किनारका बस्तीहरूसम्म पुगेर प्रभावको अध्ययन गर्ने र आवश्यक ठाउँमा स्वतन्त्र अध्ययन तथा छलफल अघि बढाउने निर्णय गरेको छ।

प्रतिनिधि सभाको १५ सदस्यीय यस विशेष समितिको सभापतिमा गणेश पराजुली असोज १४ गते (बिहीबार) निर्विरोध निर्वाचित हुनुभएको थियो। सभामुख डोलप्रसाद अर्यालले नवनिर्वाचित सभापति पराजुलीलाई पद तथा गोपनीयताको शपथ गराउनुभएको थियो। प्रतिनिधि सभाको असोज ५ गते बसेको बैठकले उक्त समिति गठन गरेको हो।

समितिले हिमालमा जलवायु परिवर्तनको प्रभाव र भोटेकोशी–त्रिशूली विपद्‌को अध्ययन गरी प्रभावित नागरिकको पुनःस्थापना, दिगो पुनर्निर्माण, भविष्यको जोखिम न्यूनीकरण, आवश्यक कानुनी तथा संस्थागत सुधार र जलवायु न्यायका लागि राज्यले अवलम्बन गर्नुपर्ने ठोस कार्यदिशा सिफारिस गर्ने मुख्य उद्देश्य राखेको छ।