असोज १७ गतेदेखि भीषण वर्षा हुने सामाजिक सञ्जालको हल्ला भ्रामक हो, आधिकारिक सूचना मात्र विश्वास गरौँ: मौसम विभाग

काठमाडौँ, असोज १४ गते । आगामी असोज १७ गतेदेखि लगातार तीन दिनसम्म भीषण वर्षा हुने भन्दै सामाजिक सञ्जालमा फैलिएको सूचना पूर्ण रूपमा भ्रामक रहेको जल तथा मौसम विज्ञान विभागले स्पष्ट पारेको छ। विभागले त्यस्तो कुनै पूर्वानुमान नगरिएको जनाउँदै अफवाहको पछि नलाग्न र केवल आधिकारिक सूचनामा मात्र विश्वास गर्न सर्वसाधारणसँग आग्रह गरेको छ।

मौसमविद् सुदर्शन हुमागाईका अनुसार हाल नेपालमा ठूलो वा भीषण वर्षा गराउने खालको कुनै पनि मौसमी प्रणाली सक्रिय छैन। आगामी दिनमा अपराह्न तथा साँझतिर कोशी, बागमती र गण्डकी प्रदेशका केही पहाडी भूभागका केही स्थानमा हल्कादेखि मध्यम वर्षा हुनसक्ने सम्भावना रहे पनि भीषण वर्षाको कुनै खतरा नरहेको उहाँले जानकारी दिनुभयो।

काठमाडौँ उपत्यकामा पनि आगामी दिनहरूमा अपराह्न तथा साँझपख बादल लाग्ने र केही स्थानहरूमा क्षणिक हल्का वर्षा हुन सक्ने भए पनि ठूलो वर्षा, बाढी वा पहिरोको जोखिम नरहेको मौसमविद् हुमागाईले स्पष्ट पार्नुभएको छ। विभागले असोज १३ गते नै विज्ञप्ति जारी गरी सामाजिक सञ्जालमा प्रवाहित भ्रामक सूचनाबारे सचेत गराइसकेको छ।

मौसम पूर्वानुमानमा साधारणतया तीन दिनसम्मको सूचना बढी विश्वसनीय हुने र विभागले दैनिक दुई पटक मौसम विवरण अद्यावधिक गर्ने गर्दछ। मौसम तथा बाढीसम्बन्धी ताजा र आधिकारिक जानकारीका लागि विभागको आधिकारिक वेबसाइट र सामाजिक सञ्जालका पानाहरू नियमित रूपमा हेर्न सुझाव दिइएको छ।