कीर्तिपुरमा लागुऔषध सेवन गरी सवारी चलाउने ३ जना चालक प्रहरी नियन्त्रणमा

काठमाडौँ, असोज १४ गते । काठमाडौँ उपत्यका ट्राफिक प्रहरी कार्यालयले लागुऔषध (लापसे) सेवन गरी सवारीसाधन चलाउने तीन जना चालकलाई नियन्त्रणमा लिएको छ। कीर्तिपुरस्थित त्रिभुवन विश्वविद्यालयको गेट अगाडि आज गरिएको विशेष लापसे चेकिङका क्रममा उनीहरूलाई नियन्त्रणमा लिइएको हो।

पक्राउ पर्नेमा एक जना मिनी ट्रक चालक, एक जना पिकअप चालक र एक जना विद्युतीय (इभी) हाइस चालक रहेका छन्। उनीहरूलाई लागुऔषध सेवन गरेर जोखिमपूर्ण तरिकाले सवारी चलाइरहेको अवस्थामा फेला पारिएको काठमाडौँ उपत्यका ट्राफिक प्रहरी कार्यालयले जनाएको छ।

नेपाल प्रहरी अस्पतालको प्राविधिक टोलीको सहयोगमा उपत्यका ट्राफिक प्रहरी कार्यालय, प्रहरी वृत्त कीर्तिपुर, ट्राफिक प्रहरी प्रभाग कीर्तिपुर र लागुऔषध नियन्त्रण ब्यूरोको संयुक्त टोलीले सो स्थानमा आकस्मिक चेकिङ सञ्चालन गरेको थियो।

नियन्त्रणमा लिइएका तीनै जना चालकलाई थप अनुसन्धान तथा कानुनी कारबाहीका लागि प्रहरी वृत्त कीर्तिपुर पठाइएको छ। काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले लागुऔषध वा मादक पदार्थ सेवन गरी सवारी चलाएको शङ्का लागेमा नजिकको प्रहरी कार्यालय वा हटलाइन १०३ र १०० मा खबर गर्न सर्वसाधारणसँग आग्रह गर्नुभएको छ।