देशभरका अवरुद्ध राजमार्ग खुलाउन तीव्रता: बिपी र कान्ति राजमार्ग छिट्टै सञ्चालनमा आउने

काठमाडौँ, असोज १३ गते । चार दिनको अविरल वर्षाका कारण आएको बाढी, पहिरो तथा लेदो खस्ने समस्याले देशभरका प्रमुख राजमार्ग र सडकखण्ड प्रभावित भएका छन्। सोमबारदेखि वर्षा रोकिएसँगै सडक विभाग र नेपाल प्रहरीले अवरुद्ध राजमार्ग तथा सडकखण्डहरू पुनः सञ्चालनमा ल्याउने कामलाई तीव्र पारेका छन्।

सडक विभागका प्रवक्ता शुभराज न्यौपानेका अनुसार असोज ८ देखि ११ गतेसम्म परेको वर्षाले धेरै स्थानमा सडक कटान तथा पहिरो गएको छ। पृथ्वी राजमार्गको धादिङस्थित च्याल्से खण्डमा पहिरो हटाउने काम भइरहेको छ भने नारायणगढ–मुग्लिन सडकको धारापानी, फिस्लिङ र सिमलतालनजिक सडक भासिएकाले एकतर्फी मात्रै यातायात सञ्चालनमा छ।

बिपी राजमार्गका माम्ती, पिप्ले, दाउन्ने–कालोपुल लगायतका क्षेत्रमा पहिरो तथा डाइभर्सन बगेकाले थप क्षति नभए मङ्गलबार साँझसम्म खुल्ने सम्भावना छ। यस्तै कान्ति राजमार्गका दुई स्थानको पहिरो हटाइसकिएको छ भने काठमाडौँलाई तराईसँग जोड्न त्रिभुवन राजपथलाई ११ मिटरसम्म लम्बाइ भएका सवारीसाधनका लागि वैकल्पिक मार्गका रूपमा सञ्चालन गरिएको छ।

हुलाकी राजमार्गको ठोरी–माडी खण्ड र मध्यपहाडीका केही खण्डहरू एकतर्फी मात्र सञ्चालनमा आएका छन्। सडक विभाग र प्रहरीले पहिरो पन्छाउने कामलाई निरन्तरता दिए पनि मौसम पूर्ण रूपमा सफा नभएसम्म र पहिरोको जोखिम नटरेसम्म अत्यावश्यक कामबाहेक लामो दूरीको यात्रा नगर्न सर्वसाधारणलाई आग्रह गरेका छन्।

मुख्य राजमार्गहरूको हालको स्थिति