अध्ययन बिदापछि नफर्किएका शिक्षक तथा कर्मचारीबाट त्रिविले असुल्यो १६ करोड ५० लाख रुपियाँ

काठमाडौँ, असोज १२ गते । त्रिभुवन विश्वविद्यालय (त्रिवि) ले अध्ययन बिदा लिएपछि नियमानुसार सेवामा नफर्किएका शिक्षक तथा कर्मचारीहरूबाट हालसम्म करिब १६ करोड ५० लाख रुपियाँ असुल-उपर गरेको छ। त्रिवि रजिष्ट्रारको कार्यालयअन्तर्गतको कर्मचारी प्रशासन महाशाखाका अनुसार हालसम्म ७५ वटा मुद्दा (केस) बाट सो रकम असुल गरिएको हो।

त्रिविले अध्ययन बिदापछि सेवामा नफर्किएका वा फर्किएर पनि तोकिएको सेवा अवधि पूरा नगरेका शिक्षक-कर्मचारीहरूबाट रकम असुल-उपर गर्ने प्रक्रियालाई तीव्र बनाएको छ। अध्ययन बिदाका क्रममा विश्वविद्यालयबाट लिएको तलब, भत्ता तथा अन्य सुविधामा नियमानुसार हर्जानासमेत जोडेर रकम असुल भइरहेको विश्वविद्यालयले जनाएको छ।

अझै थप केसहरूको हिसाब-किताब तयार गर्ने र अभिलेख खोजी गर्ने काम जारी रहेको छ। विश्वविद्यालयसँग उपलब्ध विवरणअनुसार प्रारम्भिक हिसाब-किताब भइसकेका केसहरूमा करिब २१ करोड ५० लाख रुपियाँ असुलउपर गर्न बाँकी रहेको उल्लेख छ।

त्रिविले अध्ययन बिदा उपभोग गरेर नियम अनुसार सेवामा नफर्किएका वा तोकिएको अवधि पूरा नगरेका शिक्षक तथा कर्मचारीहरूलाई २०८३ पुस मसान्तभित्र रजिष्ट्रारको कार्यालयमा सम्पर्क गर्न अन्तिम आग्रह गरेको छ। तोकिएको समयावधिभित्र सम्पर्कमा नआएमा कबुलियतनामा र विश्वविद्यालयको प्रचलित नियमअनुसार कडा कानुनी कारबाही अघि बढाउने त्रिविले चेतावनी दिएको छ।