चाडपर्वमा काठमाडौँ उपत्यकामा ट्राफिक प्रहरीको विशेष अभियान: यात्रु सहायता कक्ष स्थापना, बढी भाडा र मापसे जाँचमा कडा नियन्त्रण

काठमाडौँ, असोज १२ गते । चाडपर्वको समयमा यात्रुको सुरक्षा, सवारी दुर्घटना नियन्त्रण तथा यात्रु ठगी रोक्न काठमाडौँ उपत्यका ट्राफिक प्रहरी कार्यालयले विशेष अभियान सञ्चालन गर्ने भएको छ। चाडपर्व नजिकिएसँगै आवतजावत बढ्ने भएकाले यात्रुहरूलाई सुरक्षित र सहज यात्राको प्रत्याभूति दिलाउन यो तयारी थालिएको हो।

उपत्यका ट्राफिक प्रहरी प्रमुख एवं प्रहरी वरिष्ठ उपरीक्षक (एसएसपी) सुरेशप्रसाद काफ्लेका अनुसार अनधिकृत व्यक्तिबाट टिकट बिक्री, तोकिएभन्दा बढी भाडा असुली, सिट क्षमताभन्दा बढी यात्रु राख्ने र एउटै सिटको दोहोरो टिकट बेच्नेजस्ता बेथिति रोक्न कडा अनुगमन गरिनेछ। साथै, तीव्र गति र अस्वस्थ प्रतिस्पर्धाका कारण हुने दुर्घटना रोक्न ट्राफिक नियमको कडाइका साथ पालना गराइनेछ।

ट्राफिक प्रहरी प्रवक्ता एवं प्रहरी उपरीक्षक (एसपी) नरेशराज सुवेदीका अनुसार नयाँ बसपार्क, चाबहिल, कोटेश्वर, बल्खु, नागढुङ्गा, कलङ्की, पुल्चोक लगायतका मुख्य नाका तथा स्थानहरूमा ‘यात्रु सहायता कक्ष‘ स्थापना गरिनेछ। अभियानअन्तर्गत सवारीसाधनको यान्त्रिक अवस्था, प्रदूषण जाँच, मापसे (ब्रेथलाइजर मेसिन) जाँच र लामो दूरीका सवारीसाधनमा अनिवार्य दुई जना चालक राख्नुपर्ने व्यवस्थालाई कडाइका साथ लागू गरिनेछ।

चाडपर्वका बेला मठमन्दिरहरूमा हुने दर्शनार्थीको भीडलाई ध्यानमा राख्दै पार्किङ व्यवस्थापन तथा दिवा र रात्रिकालीन समयमा थप ट्राफिक प्रहरी परिचालन गरिने उपत्यका ट्राफिक प्रहरी कार्यालयले जनाएको छ। यो अभियानलाई प्रभावकारी बनाउन सिभिल प्रहरी, यातायात व्यवस्था विभाग, सडक विभाग र महानगर प्रहरीबीच एकीकृत समन्वय गरिनेछ।