नागरिकको जीवन रक्षा र सुरक्षा नै सरकारको पहिलो कर्तव्य: प्रधानमन्त्री वालेन्द्र शाह

काठमाडौँ, असोज १२ गते । प्रधानमन्त्री वालेन्द्र शाहले जुनसुकै विपद्को घडीमा प्रत्येक नागरिकको जीवन रक्षा गर्दै उनीहरूलाई सुरक्षित महसुस गराउनु नै सरकारको पहिलो कर्तव्य भएको बताउनुभएको छ। सामाजिक सञ्जालमार्फत सम्बोधन गर्दै प्रधानमन्त्री शाहले लगातारको अविरल वर्षाका कारण देशभर ठूलो धनजनको क्षति पुगेको बताउनुभयो।

देशभर बाढी, पहिरो, डुबान र चट्याङका कारण ४३९ वटा मनसुनजन्य घटनाहरू घटेको र गाउँ तथा सहर दुवै क्षेत्र प्रभावित भएको उहाँले उल्लेख गर्नुभयो। यस्तो सङ्कटको अवस्थामा बेपत्ता नागरिकको खोजीका साथै बाढीमा फसेका मानिसहरू र पशुचौपायाको उद्धारमा सुरक्षाकर्मीहरू अहोरात्र खटिरहेको प्रधानमन्त्रीले जानकारी दिनुभयो।

प्रधानमन्त्री शाहका अनुसार बाढी तथा पहिरो प्रभावित परिवारहरूका लागि सम्बन्धित स्थानीय तहहरूसँग समन्वय गरी अस्थायी बसोबासको प्रबन्ध मिलाइएको छ। सरकारको पूर्वसूचनाका कारण हिमाली जिल्लामा पदयात्रामा गएका यात्रुहरू र विद्यार्थीहरू सुरक्षित रहन सफल भएको उहाँको भनाइ छ।

मौसमजन्य खतरा अझै नटरेको र जोखिम कायमै रहेकाले नदी तटीय तथा पहाडी क्षेत्रमा बसोबास गर्ने नागरिकहरूलाई उच्च सतर्कता अपनाउन प्रधानमन्त्रीले आग्रह गर्नुभएको छ। कुनै पनि नागरिक सङ्कटमा पर्नेबित्तिकै उद्धारका लागि सुरक्षा निकायहरू पूर्ण तयारी अवस्थामा रहेको उहाँले स्पष्ट पार्नुभयो।