पूर्वप्रधानन्यायाधीश चोलेन्द्र शमशेर जबरालाई परिवारको जिम्मा लगाइयो: मानव अधिकार आयोगको टोलीलाई भेट्न रोकेको प्रहरीको स्पष्टीकरण

काठमाडौँ, असोज ११ गते । सुरक्षा जोखिम देखिएपछि निवासबाट काठमाडौँ उपत्यका अपराध अनुसन्धान कार्यालय, टेकु पुर्‍याइएका पूर्वप्रधानन्यायाधीश चोलेन्द्र शमशेर जबरालाई प्रहरीले परिवारको जिम्मा लगाएको छ।

महाराजगञ्जस्थित निवासबाट आइतबार बिहान ल्याइएका जबरालाई सुरक्षाको प्रत्याभूति गराउँदै उहाँले इच्छाएकै सुरक्षित स्थानमा पठाइएको प्रहरीले जनाएको छ।

कार्यालयका प्रमुख प्रहरी वरिष्ठ उपरीक्षक (एसएसपी) सन्तोष खड्काका अनुसार जबराको व्यक्तिगत सुरक्षामा गम्भीर जोखिम देखिएपछि तत्काल सुरक्षित स्थानमा लैजानुपर्ने परिस्थिति बनेको थियो। प्रहरीले सुरक्षा संवेदनशीलता कायम राख्नका लागि जबरालाई लगिएको हालको स्थान भने सार्वजनिक गरेको छैन।

यसैबिच, पूर्वप्रधानन्यायाधीश जबरालाई अपराध अनुसन्धान कार्यालयमा राखिएको खबर पाएलगत्तै राष्ट्रिय मानव अधिकार आयोगको टोली उहाँलाई भेट्न टेकु पुगेको थियो। तर प्रहरीले सुरक्षाको कारण देखाउँदै भेट्ने अनुमति नदिएपछि आयोगको टोली करिब ४५ मिनेट गेटमै बसेर फर्कन बाध्य भएको थियो।

प्रहरीले यो कदम कुनै अभियोग वा कानुनी अनुसन्धानका आधारमा नभई विशुद्ध पूर्वप्रधानन्यायाधीशको सुरक्षा व्यवस्थापनका लागि मात्र चालिएको स्पष्ट पारेको छ। जबरालाई सुरक्षित स्थानमा पुर्‍याएसँगै अहिलेको सुरक्षा अवस्था सामान्य रहेको जनाइएको छ।