प्रसिद्ध मनकामना मन्दिरको आवागमन र केबुलकार सेवा पूर्ण रूपमा बन्द

काठमाडौँ, असोज ११ गते । गोरखाको सहिद लखन गाउँपालिका वडा नं. २ र ३ मा अवस्थित प्रसिद्ध धार्मिक स्थल मनकामना मन्दिरतर्फ जाने आवागमन पहिरोका कारण पूर्ण रूपमा बन्द भएको छ। वर्षासँगै आएको पहिरोले सडक र केबुलकार सेवा ठप्प भएपछि दर्शनार्थीहरूको आवत-जावत रोकिएको हो।

सहिद लखन गाउँपालिकाका अध्यक्ष रमेशबहादुर थापा मगरका अनुसार ठाउँ-ठाउँमा खसेको पहिरोका कारण रामशाहघाट (ढाँडबारी)-मनकामना जोड्ने सडक खण्ड पूर्ण रूपमा अवरुद्ध भएको छ। सडक बन्द भएसँगै सवारी साधन र पैदलयात्री दुवैको आवागमन ठप्प भएको छ।

यसैगरी, सहिद लखन गाउँपालिका वडा नं. ३ स्थित सिलिङ्टार र चितवनको इच्छाकामना गाउँपालिका वडा नं. ४ स्थित चेरेस जोड्ने त्रिशूली नदीमाथिको झोलुङ्गे पुलमा पहिरोले क्षति पुर्‍याएपछि मनकामना केबुलकार सेवा पनि बन्द भएको छ।

केबुलकार सञ्चालनका लागि महत्त्वपूर्ण मानिने उक्त पहुँचमार्ग र झोलुङ्गे पुल क्षतिग्रस्त बनेकाले तत्कालका लागि दर्शनार्थीहरूलाई मनकामना पुग्न सकस भएको छ। बाटो खुलाउन र क्षति पुगेका संरचनाको मर्मत सम्भारका लागि प्रयास भइरहेको गाउँपालिकाले जनाएको छ।