अविरल वर्षा र पहिरोले पृथ्वी राजमार्ग बन्द: एलपी ग्यास र अत्यावश्यक वस्तुको आपूर्ति पुनः प्रभावित

काठमाडौँ, असोज १० गते । बजारमा खाना पकाउने एलपी ग्यासको आपूर्ति पूर्ण रूपमा सहज नहुँदै पुनः परेको अविरल वर्षा र पहिरोका कारण काठमाडौँ उपत्यका जोड्ने मुख्य राजमार्गहरू अवरुद्ध भएका छन्।

बिहीबारदेखि सुरु भएको लगातारको वर्षाले पृथ्वी राजमार्ग बन्द भएपछि काठमाडौँ उपत्यकामा ग्यासलगायतका अत्यावश्यक वस्तुहरूको आयात पुनः प्रभावित भएको छ।

तीन साताअघि कृष्णभिरमा आएको पहिरो हटेर काठमाडौँमा ग्यास बुलेट आउन थालेको एक हप्ता नबित्दै पुनः सडक बन्द भएपछि आपूर्ति असहज बनेको हो। नेपाल आयल निगमका प्रवक्ता मनोजकुमार ठाकुरका अनुसार मुख्य राजमार्ग अवरुद्ध भएपछि ठूला ग्यास बुलेटहरू वैकल्पिक बाटोबाट ल्याउन निकै कठिन हुनेछ। यद्यपि, बजारमा डिजेल, पेट्रोल र हवाई इन्धनको वितरण भने हालसम्म नियमित रूपमा भइरहेको छ।

निगमका अनुसार डिजेल र पेट्रोल अमलेखगन्ज डिपोबाट साना वैकल्पिक मार्गमार्फत ल्याउन सकिने भए पनि ग्यास सिलिन्डर भने ट्रकबाटै ढुवानी गर्नुपर्ने बाध्यता छ। यसअघि पनि व्यवसायीहरूले काठमाडौँबाट खाली सिलिन्डर तराईका प्लान्टमा पुर्‍याई भरिएका सिलिन्डर साना ट्रकहरूमा राखेर वैकल्पिक मार्ग हुँदै उपत्यका भित्र्याएका थिए।

यसैबिच, आपूर्ति व्यवस्थालाई सुचारु राख्न उपत्यका ट्राफिक प्रहरी कार्यालयले त्रिभुवन राजपथलाई सीमित रूपमा एकतर्फी सञ्चालनमा ल्याएको छ। हेटौँडा–भीमफेदी–नौबिसे हुँदै काठमाडौँ भित्रिने अत्यावश्यक खाद्यान्न, इन्धन र तरकारी बोकेका सवारीसाधनहरूलाई प्राथमिकताका साथ प्रवेश दिइएको छ।