मौसम विभागद्वारा ‘रेड अलर्ट’ जारी: असोज ९ देखि ११ गतेसम्म देशभर भारी वर्षाको जोखिम!

काठमाडौँ, असोज ७ गते । अन्डमान सागर आसपास विकसित भएको न्यून चापीय प्रणाली शक्तिशाली हुँदै गएपछि जल तथा मौसम विज्ञान विभागले असोज ९ गते शुक्रबारदेखि ११ गते आइतबारसम्म देशका विभिन्न स्थानमा ठुलो वर्षा हुने प्रक्षेपण गर्दै ‘रेड अलर्ट’ जारी गरेको छ। मौसममा आउने यो अस्वाभाविक परिवर्तनका कारण देशका धेरै क्षेत्रमा बाढी, पहिरो तथा डुबानको उच्च जोखिम रहेको बताइएको छ।

विभागका अनुसार विशेष गरी गण्डकी र लुम्बिनी प्रदेशका केही स्थानहरूमा उच्च हावाहुरीसहित भारी वर्षाको सम्भावना रहेको छ। यसका साथै मधेश, कोशी, बागमती, कर्णाली र सुदूरपश्चिम प्रदेशका थोरै स्थानहरूमा पनि ठुलो वर्षा हुन सक्ने भएकाले साना तथा ठुला नदीनालामा पानीको सतह बढ्ने र सहरी एवम् तराई क्षेत्रमा डुबान हुन सक्ने खतरा औँल्याइएको छ।

मौसमको प्रतिकूलताका कारण दैनिक जनजीवन, कृषि, स्वास्थ्य, पर्यटन, सडक तथा हवाई यातायातसमेत प्रभावित हुन सक्ने भएकाले विभागले अत्यावश्यक बाहेकका यात्रा नगर्न र सतर्कता अपनाउन आग्रह गरेको छ। स्थिति गम्भीर बन्न सक्ने अनुमानका साथ गृहमन्त्री सुधन गुरुङ र ऊर्जा, जलस्रोत तथा सिँचाइमन्त्री विराजभक्त श्रेष्ठले मौसम विभाग पुगेर पूर्वतयारी तथा ब्रिफिङको जानकारी लिनुभएको छ।

सम्भावित विपत्तिको सामना गर्न गृह मन्त्रालयले देशका ७७ वटै जिल्लामा रहेका विपत् प्रतिकार्य संयन्त्रलाई उच्च सतर्क अवस्थामा राखेको छ। राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार तीनवटै सुरक्षा निकाय, सङ्घ, प्रदेश र स्थानीय तहका कमान्ड पोस्ट तथा आपत्कालीन कार्य सञ्चालन केन्द्रहरूलाई चौबिसै घण्टा सक्रिय बनाइएको छ।

मौसम चेतावनी तथा विपत् पूर्वतयारीको मुख्य विवरण