चाडपर्वमा राहत: उपत्यकाका खुद्रा पसल र डिपार्टमेन्ट स्टोरमै प्रतिकेजी ११० रुपियाँमा चिनी!

काठमाडौँ, असोज ७ गते । नजिकिँदै गरेको चाडपर्वलाई लक्षित गर्दै काठमाडौँ उपत्यकाका खुद्रा पसल र प्रमुख डिपार्टमेन्ट स्टोरहरूबाटै प्रतिकेजी ११० रुपियाँमा चिनी बिक्री सुरु भएको छ। उद्योग, वाणिज्य तथा आपूर्ति मन्त्रालयको आग्रहमा साल्ट ट्रेडिङ कर्पोरेसनले खुद्रा व्यापारी तथा डिपार्टमेन्ट स्टोरहरूलाई सहुलियत दरमा चिनी उपलब्ध गराएपछि बजारमा सहज आपूर्ति हुन थालेको हो।

भाटभटेनी, बिगमार्ट, सेल्सबेरी जस्ता ठूला डिपार्टमेन्ट स्टोरका साथै उपत्यकाका एक हजारभन्दा बढी खुद्रा पसलहरूबाट उपभोक्ताले यो सुविधा पाएका छन्। खुद्रा व्यापारीहरूले कर्पोरेसनबाट प्रतिकेजी १०५ रुपियाँमा चिनी खरिद गरी ११० रुपियाँमा बिक्री गरिरहेका छन् भने कर्पोरेसनको चिनी बिक्री गर्ने पसलहरूले उपभोक्ताको जानकारीका लागि पसलमा ब्यानर राख्नुपर्ने व्यवस्था गरिएको छ।

साल्ट ट्रेडिङ कर्पोरेसनका अनुसार घरछेउकै पसलमा सहुलियत मूल्यमा चिनी पाइन थालेपछि कर्पोरेसनका आफ्ना १५ बिक्री केन्द्र र तीन मोबाइल भ्यानमा लाग्ने भीड उल्लेख्य रूपमा घटेको छ। साथै, खुद्रा पसलहरूमम्म चिनी पुर्‍याउन कर्पोरेसनले आफैँ ढुवानीको व्यवस्था गरेको छ भने ठूला डिपार्टमेन्ट स्टोरहरूले आफैँ ढुवानी गर्दै आएका छन्।

बजार अनुगमनका क्रममा अधिकांश स्थानमा उपभोक्ताले तोकिएकै मूल्यमा चिनी पाइरहेको वाणिज्य, आपूर्ति तथा उपभोक्ता संरक्षण विभागले जनाएको छ। आगामी कात्तिकसम्म बजारमा चिनीको अभाव हुन नदिन भारतबाट आयातित २५ हजार मेट्रिक टन र स्वदेशी उद्योगको २० हजार मेट्रिक टन गरी कूल ४५ हजार मेट्रिक टन चिनीको व्यवस्था गरिएको छ।

सहुलियत चिनी सम्बन्धी मुख्य विवरण