बाढी प्रभावित बालबालिकाका लागि अस्थायी सिकाइ केन्द्र र ‘सुनिश्चित भविष्य छात्रवृत्ति’: शिक्षामन्त्री पोखरेल

काठमाडौँ, असोज ५ गते । शिक्षा तथा खेलकुदमन्त्री सस्मित पोखरेलले रसुवा–भोटेकोशी बाढीबाट प्रभावित बालबालिकाको शिक्षा निरन्तरताका लागि सरकारले अस्थायी सिकाइ केन्द्र, टोल शिक्षा र ‘सुनिश्चित भविष्य छात्रवृत्ति योजना‘ अघि बढाएको बताउनुभएको छ।

प्रतिनिधिसभाको बैठकमा सांसदहरूका प्रश्नको जवाफ दिँदै मन्त्री पोखरेलले अभिभावक गुमाएका बालबालिकालाई निजी क्षेत्रको साझेदारीमा छात्रवृत्ति दिइने र कुनै पनि बालबालिका सिकाइबाट वञ्चित नहुने प्रतिबद्धता व्यक्त गर्नुभयो।

मन्त्री पोखरेलले विद्यालय शिक्षाको गुणस्तर सुधारका लागि कक्षा ५ सम्म निरन्तर मूल्याङ्कन प्रणाली लागू गरिएको र चालु आर्थिक वर्षमा विद्यालयहरूको म्यापिङ गरी शिक्षक दरबन्दी मिलान तथा पूर्वाधार निर्माण गरिने जानकारी दिनुभयो। यसैगरी, प्रारम्भिक बालविकास शिक्षक, विद्यालय सहायक कर्मचारी र विद्यालय सहयोगीको पारिश्रमिकमा मासिक थप रु. ५ हजारका दरले वृद्धि गरिएको पनि उहाँले स्पष्ट पार्नुभयो।

प्राविधिक शिक्षामा विद्यार्थीको चासो कम भई सिट रिक्त रहने समस्या समाधान गर्न कानुनी तथा नीतिगत सुधार अघि बढाइएको मन्त्री पोखरेलको भनाइ छ। साथै, नयाँ शिक्षा विधेयक तयार पार्न सातै प्रदेशमा नीति संवादमार्फत सुझाव सङ्कलन सकिएकाले दीर्घकालीन समाधानका लागि नयाँ शिक्षा ऐन जारी गर्ने तयारी अन्तिम चरणमा पुगेको उहाँले बताउनुभयो।

खेलकुद क्षेत्रको सन्दर्भमा, फिफाद्वारा निलम्बित अखिल नेपाल फुटबल सङ्घ (एन्फा) को निलम्बन फुकुवाका लागि सरकारले उच्चस्तरीय पहल गरिरहेको मन्त्री पोखरेलले जानकारी दिनुभयो।

साथै, नेपाल-चीन मैत्रीपूर्ण खेलका क्रममा घाइते भई थाइल्यान्डमा उपचाररत खेलाडी आशिष राईलाई राष्ट्रिय खेलकुद परिषद्को बजेटबाट आर्थिक सहयोग उपलब्ध गराउने निर्णय भएको छ।