असोज ७ देखि नेपालमा वर्षा गराउने नयाँ मौसम प्रणाली भित्रिने, उच्च सतर्कता अपनाउन महाशाखाको आग्रह

काठमाडौँ, असोज ४ गते । नेपालमा हाल मनसुनी वायुका साथै पश्चिमी वायुको आंशिक प्रभाव रहँदै आएकोमा अब नयाँ मौसम प्रणालीको असर देखिने भएको छ।

मौसम पूर्वानुमान महाशाखाका अनुसार बङ्गालको खाडीको उत्तर अन्डमान सागर र आसपासको क्षेत्रमा बनेको न्यून चापीय प्रणाली थप बलियो बन्दै पश्चिम-उत्तरपश्चिमतर्फ सर्ने क्रममा रहेको छ।

जल तथा मौसम विज्ञान विभागले जारी गरेको पछिल्लो बुलेटिन अनुसार यो प्रणाली असोज ७ गते (सेप्टेम्बर २३) को आसपासमा थप सशक्त भई दक्षिण ओडिशा तथा उत्तर आन्ध्र प्रदेशको तटीय क्षेत्रबाट जमिनतर्फ प्रवेश गर्नेछ। यसको सीधा असर स्वरूप नेपालका विभिन्न भूभागमा वर्षा गराउने जलवाष्पयुक्त वायु प्रवेश गर्ने सम्भावना देखिएको छ।

तथापि, यो प्रणालीका कारण नेपालमा हुने वर्षाको जोखिमको स्तर र त्यसले पार्न सक्ने सम्भावित असरबारे अहिले नै यकिन गर्न नसकिने महाशाखाले जनाएको छ। जल तथा मौसम विज्ञान विभागले उक्त प्रणालीको गति र दिशालाई निरन्तर निगरानी गरिरहेको छ।

मौसममा आउन सक्ने सम्भावित परिवर्तन र सतर्कताका लागि महाशाखाले सर्वसाधारणलाई अद्यावधिक मौसमी सूचनाहरू नियमित रूपमा पालना गर्न अनुरोध गरेको छ। आवश्यकता अनुसार विभागले थप विस्तृत बुलेटिन जारी गर्दै जाने जनाएको छ।

मौसमी प्रणाली र यसका मुख्य कारणहरू