संयुक्त राष्ट्रसंघको महासभामा नेपालले ‘जलवायु न्याय’ को मुद्दा सशक्तरूपमा उठाउने: परराष्ट्रमन्त्री खनाल

काठमाडौँ, असोज ४ गते । परराष्ट्रमन्त्री शिशिर खनालले सेप्टेम्बर २२ देखि सुरु हुने संयुक्त राष्ट्रसंघको ८१ औँ महासभामा नेपालको तर्फबाट ‘जलवायु न्याय‘ को एजेण्डा सशक्तरुपमा प्रस्तुत गरिने बताउनुभएको छ। उहाँले जलवायु परिवर्तनमा नेपालको भूमिका ०.१ प्रतिशत मात्र भए पनि यसको ठूलो क्षति भोग्नुपरेकाले अन्तर्राष्ट्रिय मञ्चले नेपालमाथि न्याय गर्नुपर्ने बताउनुभयो।

परराष्ट्रमन्त्री खनालका अनुसार नेपालको परराष्ट्रनीति संविधानले नै निर्देशित गरेको र सोही अनुसार बहुपक्षीय तथा सन्तुलित नीति अँगालेर सरकार अघि बढिरहेको छ। विगतमा दलीय वा गुटगत स्वार्थमा परराष्ट्रनीतिको गलत प्रयोग भएको उल्लेख गर्दै उहाँले वर्तमान सरकार राष्ट्रिय हितलाई केन्द्रमा राखेर अघि बढेको स्पष्ट पार्नुभयो।

यस पटकको महासभामा प्रधानमन्त्री बालेन्द्र शाहको नेतृत्वमा नेपाली प्रतिनिधिमण्डलले भाग लिनेछ। प्रधानमन्त्री शाह सेप्टेम्बर २३ (असोज ७) मा न्यूयोर्क पुगेर सेप्टेम्बर २५ (असोज ९) मा फर्किने कार्यक्रम रहेको छ। प्रधानमन्त्रीले महासभालाई सम्बोधन गर्नुका साथै जलवायु न्यायका विषयमा विभिन्न देशका समकक्षीहरूसँग उच्चस्तरीय साइडलाइन बैठकहरू पनि गर्नुहुनेछ।

प्रधानमन्त्री शाहको नेतृत्वमा महासभामा हुने नेपाली सहभागितालाई अन्तर्राष्ट्रिय समुदायले चासोका साथ हेरिरहेको परराष्ट्रमन्त्री खनालले बताउनुभयो। नेपालले भोगेको जलवायु संकट र त्यसको समाधानका उपायबारे विश्व समुदायको ध्यानाकर्षण गराउने यो महत्त्वपूर्ण अवसर हुने उहाँको भनाइ छ।