संविधानको प्रभावकारी कार्यान्वयनबाटै देशको समुन्नति सम्भव: मुख्यमन्त्री सुरेन्द्रराज पाण्डे

लेखनाथ, असोज ३ गते । गण्डकी प्रदेशका मुख्यमन्त्री सुरेन्द्रराज पाण्डेले संविधान दिवसको अवसरमा शुभकामना सन्देश जारी गर्दै नेपालको संविधान, २०७२ को प्रभावकारी कार्यान्वयनबाटै देशको समुन्नति र सुशासन सम्भव भएको बताउनुभएको छ।

सङ्घीयताको सफल कार्यान्वयनले मात्रै संविधानले परिकल्पना गरेको समावेशी, सन्तुलित र जनमुखी शासन प्रणालीलाई संस्थागत गर्न सकिने उहाँको भनाइ छ।

मुख्यमन्त्री पाण्डेले सङ्घ, प्रदेश र स्थानीय तहबीचको समन्वय, सहकार्य र सहअस्तित्वको भावना व्यवहारमै सुदृढ हुनुपर्नेमा जोड दिनुभएको छ। प्रदेशका संवैधानिक अधिकारको प्रयोग, कानुन कार्यान्वयन तथा वित्तीय सङ्घीयतालाई सबल बनाउन सङ्घ सरकारबाट आवश्यक सहजीकरण र सहयोगको अपेक्षासमेत उहाँले व्यक्त गर्नुभएको छ।

‘आत्मनिर्भर र समुन्नत प्रदेश: सुखी प्रदेशवासी’ को सङ्कल्प सार्थक बनाउन सम्पूर्ण प्रदेशवासीको साथ र सहयोगको आह्वान गर्दै मुख्यमन्त्री पाण्डेले दिगो शान्ति र विकासका लागि प्रतिबद्धता जनाउनुभएको छ।

संविधान दिवसको अवसरमा सहिदचोकमा माल्यार्पण गरी मुख्यमन्त्री तथा मन्त्रिपरिषद्को कार्यालयमा मूल समारोह आयोजना गरिएको छ।