जोखिमपूर्ण हिमतालको जलस्तर घटाउन सरकारले तयारी थाल्यो: विराजभक्त श्रेष्ठ

काठमाडौँ, भदौ २८ गते । ऊर्जा, जलस्रोत तथा सिँचाइमन्त्री विराजभक्त श्रेष्ठले नेपालका जोखिमपूर्ण हिमतालहरूको जलस्तर घटाउन सरकारले आवश्यक तयारी गरिरहेको बताउनुभएको छ।

हिमताल फुटेर आउन सक्ने सम्भावित बाढी र विपद्को जोखिम कम गर्नका लागि वैज्ञानिक हिसाबले पानीको सतह घटाउने वा आवश्यकता अनुसार ‘ब्लास्टिङ‘ गरी जल-सतह निकास गराउने विषयमा विज्ञहरूसँग घनिभूत छलफल भइरहेको मन्त्री श्रेष्ठले जानकारी दिनुभयो।

मन्त्री श्रेष्ठका अनुसार ग्रीन क्लाइमेट फण्ड (GCF) बाट प्राप्त आर्थिक तथा प्राविधिक सहयोग परिचालन गरी विपद् जोखिम न्यूनीकरण तथा व्यवस्थापन प्राधिकरण र स्थानीय तहहरूसँगको समन्वयमा यही वर्षभित्र हिमतालको पानी घटाउने कार्य अघि बढाइनेछ। जोखिमको मात्रा अध्ययन गरी आवश्यक सबै पूर्वतयारी सकिएपछि सरकारले यस सम्बन्धमा औपचारिक निर्णय लिने उहाँको भनाइ छ।

अन्तरराष्ट्रिय एकीकृत पर्वतीय विकास केन्द्र (ICIMOD) र संयुक्त राष्ट्रसङ्घीय विकास कार्यक्रम (UNDP) को संयुक्त अध्ययन अनुसार नेपालमा हाल २१ वटा हिमतालहरू उच्च जोखिममा रहेका छन्। जसमध्ये कोशी र गण्डकी जलाधार क्षेत्रमा मात्रै चारवटा हिमताल अति उच्च जोखिमयुक्त मानिएका छन्।