राष्ट्रिय पाठ्यक्रम प्रारूप परिमार्जनको गृहकार्य: २८ जिल्लाबाट सुझाव र पृष्ठपोषण सङ्कलन सुरु

काठमाडौँ, भदौ २८ गते । शिक्षा तथा खेलकुद मन्त्रालयको मन्त्रीस्तरीय निर्णय अनुसार ‘राष्ट्रिय पाठ्यक्रम प्रारूप, २०७६‘ लाई समयसापेक्ष, व्यावहारिक र जीवनोपयोगी बनाउन व्यापक सुझाव तथा पृष्ठपोषण सङ्कलन अभियान सुरु गरिएको छ।

प्रा.डा. बालचन्द्र लुइँटेलको संयोजकत्वमा गठित १४ सदस्यीय कार्यदल र १२ वटा विषयगत समूहले सातै प्रदेशका २८ जिल्लामा पुगेर फिल्डस्तरमै शिक्षक, विद्यार्थी, प्रधानाध्यापक, अभिभावक, विज्ञ तथा स्थानीय तहका प्रतिनिधिहरूसँग प्रत्यक्ष अन्तर्क्रिया गरिरहेका छन्।

भदौ ३० गतेसम्म चल्ने पहिलो चरणको अन्तर्क्रियापछि ७७ वटै शिक्षा विकास तथा समन्वय एकाइ र पाठ्यक्रम विकास केन्द्रको वेबसाइटमार्फत पनि डिजिटल सुझाव लिइनेछ। पाठ्यक्रम विकास केन्द्रका अनुसार आउँदो तिहारअघि नै सुझाव सङ्कलनको सम्पूर्ण काम पूरा गरिनेछ। यस अभियानमा शिक्षामन्त्री सस्मित पोखरेल तथा मन्त्रालयका उच्च अधिकारीहरू समेत विभिन्न जिल्लाका कार्यक्रममा सहभागी भइरहेका छन्।

बौद्धिक पूर्वाग्रहबाट मुक्त भई फिल्डको वास्तविक अवस्था र भावी पुस्ताको आवश्यकतालाई केन्द्रमा राखेर पाठ्यक्रम परिमार्जन गर्ने मन्त्रालयको लक्ष्य रहेको छ। यस प्रक्रियामा कोशी, बागमती, गण्डकी, लुम्बिनी, कर्णाली, सुदूरपश्चिम र मधेस प्रदेशका विभिन्न हिमाली, पहाडी तथा तराईका जिल्लाहरूलाई समेटेर स्थानीय आवश्यकता र अनुभवलाई समेत नयाँ प्रारूपमा समावेश गरिनेछ।

पाठ्यक्रम प्रारूप परिमार्जन सुझाव सङ्कलनको मुख्य सारसंक्षेप